الضيقه اللي بالصدر عيت تروح

[نشمي المويعزي]

أسعد الله مساءكم جميعاً يسعدني ويشرفني أن أضع بين أيديكم هذه الابيات المتواضعه آمل أن تحوز على استحسانكم وهي المصافحة الأولى بهذا المنتدى الشامخ :

الضيقه اللي بالصدر عيت تروح=حاولت فيها ماقدرت ازيحها
ضيقة صدر كسرى بعد فتح الفتوح=يوم الاعادي مانفع تسليحها
لا وآوجودي يالبروق اللي تلوح=مثل السيوف البيض في تلويحها
بيدين من يروي شبا السيف الذبوح=اللي ليا شاف العدا ياويحها
اليا بدا سيفه يشوح الروس شوح=ذكّر علي اللمّع وتكشيحها
بروق خير تلوح بالمزن الصبوح=والريح دوبه كف من تلقيحها
مزنٍ مابين الارض والقبه سبوح=مثل الطيور الكاسره تجنيحها
والارض كبدٍ من ظما الوسمي تفوح=فوح الدلال البيض مع تبريحها
والمزن هل وعل قبل إنه يروح=لين الحزوم السود بيّن سيحها
والارض صارت كنها البنت الطموح=فستانها اخضر والفراق مريحها
فستانها الخضره وخاطرها سموح=وريح الخزاما والشمطري ريحها
وفياضها مكتظةٍ فيها السروح=اهل البل اللي همهم تصليحها
من عقب ماترعى الهراس من السفوح=اعاظها الله بالفياض وشيحها
ذودٍ ليا عرّض على عيون الشفوح=تدمع عيونه من كبر تفتيحها
هذا دوى الضيقه وتضميد الجروح=من عالمٍ عسى العزيز يبيحها
ناسٍ عن الدرب العدل فيها جنوح=وتشرح الجثه بعد تشريحها
والضيقه اللي بالصدر عيّت تروح=يمكن مجاديح السحاب تزيحها
نشمي حامد المويعزي