متى ضمير العُــرب من نومـه يقــوم ،،؟

[داعي الشوق]

يالربع كدرتوا علي لذة النوم = يكفي جروحٍ ما لقينا دواها
الوضع متردي و به هم و هموم = يشكي من احداث تزايد غثاها
ضعنا و ضاعت فيه نخوات و سلوم = و استفحلت فينا النغايز معاها
ما عاد يجمعنا على الدين مطعوم = صرنا طوايف ساعيه في وذاها
هذاك يختلها و بالفتنه يحوم = و ذولاك ما ندري وش اللي وراها
كلن على ظنه مسوي له علوم = يوم الولاء بنفوس ناسٍ عداها
غدت عروبتنا مثل سايم يسوم = في متجر الاحقاد باع و شراها
المسجد الاقصى له سنين ملزوم = مسلوب في يدين اليهودي ثراها
كل يوم يتدنّس من اقدام مذموم = جريمةٍ كبرى على الله جزاها
وين الحديث اللي له اسناد و رقوم = قاله رسول الله و بين خفاها
المؤمنين اخوان حاكم و محكوم = من منهج التوحيد يصدح نداها

مثل الجسد لو صار سايره محموم = ترا السبب عضوٍ بجسمه شكاها
الدين تحيا به حضارات و تدوم = و دستورها القرآن حامي حماها

متى ضمير العُرب من نومه يقوم = عن كاهله يرمي ركايم طواها ؟

تمت و من خاطر به الجرح موسوم = أزكى سلام لكل منهو قراها

و صلاة ربي عد ما تظهر نجوم = على شفيع الخلق ساعة لقاها