سحايب مخمليه

[سمّار]

والله اني شفت وجهه في سحابه=من سحايب نجد ذيك المخمليه

يوميَّ آدوّج وفي صدري كأآبه= من ظنون افكار باوهامي مليه

كم رزم قلبي وانا اتذكر غيابه= يا عُظُم صبري ويا عُظم البليه

الطريق اللي سلكته من رحابه=كنت به باتيه ودروبي خليه

ما بغيت الا اعتزي باهلي شبابه=ياهل هذيك السيوف المصقليه

في زمان الكرب وايام الطلابه=يوم نيران الحروب مشمعليه

اوشك ان السيف يبرى من نصابه=واوشك ان القرم يتعذر وليه

واوشك ان الحُرّ ما يحرز زهابه= واوشك ان القبر تنتثر صليه

وانتم البحر الذي يزخر عبابه=وانتم اللي تمّنون الدوخليه

وانتم اللي دايماً ولكم مهابه=من اله الكون هامتكم عَليِّه

قد سرح فكري ولا كمّل حسابه=لين جايتني السحاب الهمليه

واشرق الوجه الذي حتى حجابه=ما حجبه وشعّت انواره جليه

شفت نور الشمس خيّط له ثيابه= والنجوم لحضرته صاغت حُليه

اتبعه بالعين واتمعّن خطابه=بعضي بكلي غدوا له هجوليه

اقدر اني اقول واوصّف واشابه=غير يكفي ما ذكرته من حليه

والله اني ماني بقاصد عتابه= بسّ ما خلاني اوفي اللي عليَّه

اطلبه يسمح بوعدٌ لي درى به=وان ضحك ذا الحين فان الضحك ليه

يرسم ابوجه السحابه وش جوابه= وابتبيّن لي علوم الزوعليه