غرام الضمائر

[سمّار]

ما شفتني..!جيتك من الصبح زاير=ميّلت لك وابغا تميّل معايه

جربت وصل اللي نزيه السراير؟=عز الله ان تكتب بوصله روايه

إيه انت...ليه تقول ماهو بصاير؟=السالفه في خاطري م البدايه

وادري..بفكرك شئ مِثَلْ هيك داير=اقول لك غالي وقلْ لي غلايه
واضح بحالتنا غرام الضماير=ياما تلاقوا من وراك ووْرايـه
اصلا ..أنا وإياك فينا نظاير=اقلّها ..نمشي بنفس الحكايه

وجواهرك تحتاج لفة حراير=وانا شغافي لك حرير...وكفايه

لا عاد ودّك لا تَعذّر بحاير=شاعرك في شعره دليل الهدايه

ترى بقلبي جرح ياشيخ غاير=واخاف يسلك بي طريق الغوايه

وانا ترى ما احب كثر الشواير=ولا احب من سوى بسدي دعايه
ودام انني جيتك من الصبح ساير=لاتنتظر حتى نصل للنهايه
لا جاك قلبي من علايقه طاير=طيّر بعد قلبك يجول بسمايه