فتحت جوالي ولأحولي أشغال

[عبدالمحسن الرحمه]

فتحت جوالي ولأحولي أشغال=كوعي على المركا وحالي رديه
نويت أبكتب عن خفا الحال والبال =حال ٍ بها كل الأمور العصية
بكتب عن اللي داخل الصدر يجتال=ضيقة يلازمها هموم ٍ صليّه
عطتني من جيب الشقا دوم غربال=مصروفها دايم تزايد عليّه
الصدر دكان ٍ لها تسلب الحال =تبدل أرفوف الفرح بالأذية
تبحر بي أهمومي على شط الأهوال=أجلس لحالي والمواجع خفيه
الدمع من عيني على الخد همّال=والجوف تلعب به هموم ٍ قويه
لاحان وقت الليل جريت موال=خطر ٍعلى روحي تذوق المنية
الله أكبر يا زمان الشقا طال=ما عندكم نية تفارق عنية
عذبتني غربلتني كل الأحوال=رافقتم قليبي وصرتم سمية
كن الحشا يمه غدا فيه زلزال=تهدمن كل الضلوع العليّة
غديت بين الهم والغم صلصال=تلاعبوا فيني صباح وعشية
الهم مع غمي غدوا هم الأبطال=في مشهد أحلامي فقده الحمية
ياليت حظي يمه اليوم ينطال=والله لأسري له بكل أريحيه
مير البلا يمه غدا الحظ خيال=أبعد عن أعيوني وحالي شقيه
الله من قلب ٍ غدا فيه ولوال=سهران ليله والملا مهتنيه
من العنا جسمي يجزيه سلال=يا الله رحمك يا مجيب الشكيه
غديت بالدنيا مقيد بالحبال=محتار مالي غير رب البرية
الواحد اللي مالكٍ يوم الأهوال=راجيه يرحم من همومه عتيه
واختم واصلي عدّ ما هل همّال=وإعداد ما هلت مزون ٍ قويه
على محمد كاسب ٍ كل الأفضال=صلاة تاصله صباح وعشيه

فجر يوم الخميس