يقولون قطع اعناق لا قطع الارزاق

[الطائر المهاجر]

يقولون قطع اعناق لا قطع الارزاق= وينسون قول المصطفى في وصاته
فرزق ابن آدم يطرده وين ماساق = ولا يتركه لو قربّت به وفاته
فلا شفت باب انسد او شفت ماعاق= فدور بديلٍ دون يأس بلقاته
واذا ضقت من ارضك ترى الكون ماضاق= فغيّر مكانك لاتحمّل عناته
ولا شفت جمعٍ ثار لاتكون سباق= ولو يعجبك مطْلبه باجمل لغاته
ترى الناس مثل البط لاسمع نقناق= يردّد وراه الصوت لو جهل ذاته
ولا يدري اللي كان يخفي بالاعماق= ومن خطط لفعله ويحمي حصاته
فحنا بزمانٍ بين شاري وبوّاق= وبايع ضميره غارقٍ في سباته
يضحي بغيره ماعرف قلبه اشفاق= ويقبض اجاره مفتخر في سواته
فخلك حذر من كل ماكر ودرّاق = يخادع لعقلك ماعرفت لْحكاته