(( حنا معك لو تروح ايمين وشمالي ))

[طلال العازمي]

السلام عليكم ورحمة الله وبركاته


بعد الغياب وبدون مقدمات



ياطير ياللي يرفرف في جناحينه = فوق المباني وواضح عندك الغالي

حنا لنا اسنين درب العشق طاوينا = ولا حسبت اني ابيوم أعيد موّالي

صدفه وياليتنا للدرب ما جينا = صدفه سريعه ولكن دوّخت بالي

يا سهلها كان دربٍ فيه مرّينا = ويا صعبها نظرةٍ فالكبد تجتالي

من يومها والضمير ايقول ... هو وينه ؟ = ومن يومها إلحاله اللي للغلا نالي

حتى أصبح القلب وعزومي مساجينه = والرجل تركض على جرّته طوّالي

اروح له بالشغل والشوق حادينا = مغير ابي شوفته شوفته تهنالي

و لا بان زوله ولدّت عيني ابعينه = انسى الشغل كله ... اعيونه هي اشغالي

ادور العلم و لا به علم ياتينا = مغير طيرٍ يرفرف بالسما عالي

لو ان علومك تباع ابسوق .. شارينا = واريّح القلب من همّي وغربالي

مير ان وصلك صعب والبعد ياشينه = ومن صدّتك ما وصل يا زين مرسالي

تعال وارحب ولا تبخل تماشينا = حنا معك لو تروح ايمين وشمالي

وإن جيت غالي وإذا قفّيت غالينا = مقدر أكذّب واقول إن رحت مو غالي