يوم الهوى نادا سمعته ولبيت

[الطائر المهاجر]

يوم الهوى نادا سمعته ولبيت= وانا احسب اني فاهم في دروبه
طاوعت قلبي والعقل عنّه انحيت= سكرت من كاسٍ لذيذ العذوبه
حلمٍ بدا لي تالي الليل واغفيت = وصحيت مثل اللي تهاوت غروبه
بين السما والارض ظني تعليت= واثري بليلٍ مدلهم الخطوبه
من لاحسب للبحر ما تنفعه ليت = لا من سحبه الموج لاقصى غبوبه
عزي لحالي كلما اصبحت وامسيت= ادافع جيوش الهموم الغضوبه
في وقت ما يرحمك لوما تقويت= بظهر يعزك كالأسد في وثوبه
المشكله مايوم للراس احنيت = حتى الاقي ظهر امسح لثوبه
ماجت لي الدنيا على ما تمنيت = ولا انصفت بالعدل من حس شوبه
كنت احسب ان الرجل بالعلم واخطيت= في وقت تكفي الواو ترفا عيوبه
وترفعه فوق سهيل لو كان كالميت= طبلٍ وريح العقل ما جاء لصوبه
يوم ان ولد اللاش عن عيبه اغظيت= غطى عيوبه ظهر واعلا رتوبه
لو قال ابسرح بالغنم قلت وليت= خايف على المكياج تشكي لذوبه
جار الزمان وياكثر ما تعنيت = احطب عناه ولا نعمت بشبوبه