شريك عمرك من اذا طحت تلقاه

[الطائر المهاجر]

شريك عمرك من اذا طحت تلقاه= يسهر على راحتك لو حرم نومه
مهوب من يعجبك مادام برضاه = واليا زعل بانت خفايا علومه
نكار للمعروف يشناك لو جاه= ابعد بعيد ولو معادي لقومه
عقله صغيرٍ ما يحسّب لماطاه= ينشر غسيله لو حرق في هدومه
ما ينومن في سر مهما تناهاه= لو هو يضره ماحسب وش سقومه
مهفةٍ في يدين جاهل وشرواه= ممن يحسب انه يفرج همومه
البيت له حرمه والاسرار مبناه= ولا من تفشت طاحت اعلا رسومه
عليك باللي كالحصن يوم تنصاه= ذراك يوم الوقت ينفث سمومه
ولا تنخدع بالأصل فالعرق تواه = فاللي تظنه صقر تلقاه بومه
ولا تقرب اللي المصلحه دوم مبداه= يبيع خله لو لقى من يسومه
ركز على اللي تعرفه كيف منشاه= وشلون عايش بين اهل وعمومه
ماشٍ يعيبه وين ماكان ممشاه = عن قلب دينه ماسكٍ في سلومه