لاصرت ما تعرف تجر الربابه

[الطائر المهاجر]

لاصرت ما تعرف تجر الربابه= ولا تدق الطار او تعزف الناي
فانته نشازٍ في زمان النهابه= حتى ولو حطوك فراش للشاي
للشاي اصوله وانت مابك ذرابه= عايش على وقتٍ مضى تجهل الجاي
يمكن بطبخك له تمرر شرابه= ويمكن تعفسه فانت خالفت للراي
وللشاي وقته فيه عز ومهابه= اذا اجتمع شمل الجواكر على الهاي
تنشا المزن من دون برق وسحابه= وتمطر ذهب بيدين طابخ وشواي
حراج وحده في يدين العصابه= والسمسري والسرسري الكل شراي
والفجر لامنه بدا باقترابه= الكل صلى قبلةٍ فوق الاشلاي
واخذت لك تعريف رمز وكتابه = يمشي معك مادمت بالحق دواي
ويكتب بأنك تستحق الحرابه= من كل فاسد يخلط الزيت بالماي
مالك سوى انك تنزوي في خرابه= وتحرق بدمك دام للحرق غواي
مالك ومال الناس مهما تجابه = خسران يامعاند بحر كان نساي
فالمرجله راحت بعصر الكوابه= كلٍ يبي ينهش ولو كان صواي
فالكل صار اليوم فاقد صوابه= واللي بعقله صار كالغصن ذواي