ياميمتي هاتي فراشي وغطين ....؟

[ابوعبدالرحمن القريشي]

هذه القصيدة هي رثاء في قريب لي توفي وهي من القصائد القريبة الى قلبي
اتمنى ان تنال اعجابكم .


ياعين هاتي ما ورى محجر العين = وياقلب دمك لاقضى الدمع هاته
على الذي في عام سته وعشرين = تاسع محرم خبرون بوفاته
ياميمتي هاتي فراشي وغطين = قولي لي انك حالم في مماته
قولي لي انه حي مامات تكفين = خليني ابقى بالامل في رجاته
وافجعتي ياناس جوا المصلين = وحطوه قدام الامام بصلاته
وعقب الدفن جونا جموع معزين = وكلن يمسح في يديه عبراته
وتأكدت لي موتته بالبراهين = وياكثر منهو منفجع في وفاته
اببكيه ياخالي سنين ورى سنين = واببكيه لامنه طرت ذكرياته
واببكيه ياعمه الين اسود العين = يقلب بياض وتنعمي من بكاته
واببكيه لامن شفت طفله ينادين = اشوف به كامل حلايا صفاته
وتبكيه بنت شالت الحمل حملين = عافت لذيذ النوم لاواشقاته
مالومها لوكان تصفق بكفين = ولو كان بين الناس شقت عباته
راح العزيز اللي توده من سنين = وفي لحظة ضاعت جميع امنياته
يالله طلبتك يوم عرض الموازين = تعطيه باليمنى حصيلة حياته
وتجعل مقره بين ورد وبساتين = في جنة الفردوس باعلى درجاته