ليتك تصنفني من اعداد الاغراب

[ابو أنس]

ليتك تصنفني من اعداد الاغراب=اللي لهم هرجك منمق ومعسول

وش خانة الاحباب لاجو ورا الباب=وان كنت اشك اني حبيب(ن)ومقبول

دام القريب يحال دونه بحجّاب=وعنه الدروب مقفّله باكبر قفول

فانا الغريب ولو لبس خز وثياب=في داخلي غربة مشاعر ومدلول

تغيرت عندي مفاهيم وحساب=وتلخبطت عندي معايير وعقول

كنت اعرف البسمه بهاسحرالالباب=من سحرهاتغسل صدىالقلب ويزول

الا بقاموسك غدا الضحك جلاّب=يفتح نوافذ للنكد شرحها يطول

واذا التقيت بطلتك والكدر ذاب=واستاسع الخاطر تصير انت مذهول

ويصعب عليك انك تهلّي بترحاب= وتستكثر البسمه وانا اقول يحّول

ياسيدي يامهجتي يغلا الاحباب=صحيح احبك واعشقك منك معلول

وافرح بشوفك واهتني بك ولا اهاب=الا من الجرح الذي منك مجهول

وانتا سهامك صوبنا نِصْلْ وحراب=مسمومة(ن)تِدْعي الهدف حيل مشلول

وان كان لجروح الجسد طب واعشاب=ترا الكرامه جرحها ماله حلول

حتّى ولو انّه تلايم فلاطاب=جوفه صديد ولو نشف دوم مبلول

جرح يتنقّض من صغيرات الاسباب=والعاقل اللي يحسب الفعل والقول

وانا ترا ماني مهمّش بلا اصحاب=ولاني من اللي يفرح اليا لمح زول

ولاني من اللي عقله صغير لعّاب=لاهبّت النسمه تحركت مخبول

اعرف مكاني واحسب حساب الاجناب=واكف رجلي عن متاهات ووحول

وان كنت تجهلني فذا بعض ما غاب= ليك تعاملني غريب(ن) على طول