بس مـشّ حــــالـكـ

[عناد الرواد]

يا وقت يلي فيك ما فيك كافيك=دور السلامه لو لقيت السلامه
ما شفت منك الا العنا والشرابيك=لا صار من ذيل البعير انخطامه
حبكتها للي يبون المحابيك=تنشر وتقراها عيال ٍ نشامه
يا صاحبي والشك والشوك والشيك=ترى الرجال اشكال مزن وجهامه
احدن تعذّر له وهو مبتلش فيك=كنه على قلبك يسرهد كلامه
واليا عرضلك عاتبك في مساويك=ما يقدر اظروفك ولا له كرامه
واحدن توهّق به وجالك يناديك=من هزعة ٍ وحده يدهدم اردامه
يشيل نفسه كالجمل للمباريك=وقت السعه كتفه يباري اسنامه
ولا ضاقت افجوج الخلا جاك يشكيك=ثم راح شرق وغرب واقصا تهامه
واحدن يقلد والتقاليد تشكيك=نسى الغراب ومشيته للحمامه
واحدن يحيز ابهالمجالس على الريك=وهو ثور ٍ أنبط ما يوّزن كلامه
يا لايمي في الخلق خلني اوريك=تنوّع ارجال الردى والشهامه
اللي يودك يا بن عمي يصافيك=ويفرض عليك من الاخير احترامه
واللي معذربك ترى ما سأل فيك=وده على خدك يشوف العلامه
والعد لو دونه حرام إنْه يسقيك=ويسوقها تطنيش ولى غشامه
ويدعيلك الله يا عسى الله يشفيك=وينثر ملح ع الجرح أبن الفدامه
يعزّ قولة والنعم عند طاريك=جعله هفو طير الفلس والندامه
يا صاحبي والعرف قد صار تسليك=بس مشّ حالك بين ذيب ونعامه
واللي انجرب لاتجيه خوفا ً يعاديك=خلْه إبجربه ألين يبرى عدامه
ارحل وخل الصبر بالصدر يدريك=لين تلقي بالوجيه ابتسامه