ترى هذا شعوري وانطباعـي

[فارس القوافي]

يجيني شوق مدري وش يجيبـه =ويدعيني بتالـي الليـل داعـي

واسولف عنك واحلم بك قريبـه =ويفضح لهفتـي زود اندفاعـي

سرقني الوقت من دنيـا غريبـه =وجيتك روح في عصر الضياعي

اهلّـي بـك وانـادي ياحبيبـه =واعطّر صيحتي وافرد ذراعي

واشوفك وردتي بارضٍ رحيبـه =وحيده في سكوني واجتماعـي

تعالي لملمي اجـروحٍ عجيبـه =وهزّي الشوق يمطر لك بساعي

تعالي واسقي الـروح العطيبـه =تجرّعني الضما شرّ اجتراعي

انا روحي مـن الدنيـا صويبـه =وطول الوقت وآنا في نزاعـي

لقيتك في زمـن ياكبـر عيبـه =كُثر فيـه التمـرّد والخداعـي

وانا خايف تصيب الروح خيبـه =واضيّع مركبي ويّـا شراعـي

طبيبه وادري انـك لـي طبيبـه =ترى هذا شعوري وانطباعـي

حقيقة قلب مـا حـيٍّ دري بـه =يحبّك بسّ ! خايف ما تراعـي