ديوان عبدالله الشويمان (الرعد)

[الطائر المهاجر]

((خاطره))

شفت الزهور..
اللي هناك ملونه..
يا عيني..
في وسطهن ورده زهت بالوانها..
هذيك هي..
مفتولة الغصن الرطيب المردنه..
هذيك هي سلب العقول..
ايضا بعد وجنانها..
يا عيني..فيها الصبا..
فيها الصفا..
فيها الندا..
وفيها بسبب الله شفا..
لكل الجروح..
منها تفوح..طيب الروايح..ومنها يجي حلو العسل..
آه..اغار انا من النحل..
والوردة اللي زاهية وسط الزهور الملونه..
يا عيني..
وعليَّ انا فات الأوان..ما عاد يمدي قطفها..
الورده االي شفتها..
هذيك هي..
سلب العقول ايضا بعد وجنانها

/////////

((خاطره))

حرامي..حرامي
سألت وقلت وين انتي؟
بكل ادروبي وين انتي؟

سألت الصبح المقبل
سألت المغرب المقفي

سألت وقلت وين انتي؟
ايبله قلت وين انتي؟

فقدتك من خذك مني
وشفتك في حسب ظني

مع الجاير
على الطاير

خذاك وصرت انا انوحي
على روحي
وعليها تنزف اجروحي

حرامي..حرامي
هو اللي سارقٍ روحي

ترى الجاير
على الطاير

هو اللي سارقٍ روحي

/////////

((همسه))

وش فيك قلِّى حبيبي

وش فيك ؟.. أجاك الخطا مني ونا مدري؟
وش فيك ؟.. ألا تبدي الاسرار وتعلنها؟
*****
***
وش فيك ؟.. سببت لي ضيقات في صدري!
وش فيك ؟.. أما تدري ان النفس يحزنها؟
*****
***
وش فيك ؟.. محتار انا في غفلتك بدري!
وش فيك ؟.. أما ترحم بحالي و توطِّنها؟
*****
***
وش فيك ؟.. قلّي حبيبي يا بعد عمري...
وش فيك ؟.. كان الغلا لك ناقص اعلنها؟
*****
***

//////////

((همسه))

اراعى للنجوم اللي رفيعاتٍ منازلها=وادير الفكر بالدنيا الين الراس جاه صداع
وش اللي صار وكيف الناس تبدل في عمايلها=عقب كانت على مبدا وتمشي به شبر وذراع
انا مدري قلوب الجيل الاخِر مع بصايرها=لعلوم المرجله نسيت او انه للعمى تنصاع
قطاعة يا الله الخيره وبعض الجيل حاملها=طفت عيعات عيعات المنادي وكل شيٍ ضاع

/////////

((همسه))

يامن على مضجاعٍ ابيض تعاني=صلف المرض أَطلب عسى الله يشفيك
ياخوي يابن العم عضل الزماني=تقدير رب الكون علام وش فيك
لا تشتكي ضيم الدهر والليالي=خلك قوي باللي عيونه تراعيك
خلك على الايمان فيما تعاني=واصبر على الاقدار الله يرضيك
صبرك أجر ومطهِّر الذنب عالي=والعالي الله اطلبه ثم يعطيك
سبحانه اللي من ترجاه نالي=نال السعادة والاماني وتبريك

/////////

((خاطره))

عذرا بها عيني شخصت من حلاها=غصبٍ عليها قلت عيني معذوره
صلَّب معاها الفكر حتى نواها=وبسجته قلبي تحرك شعوره
من غير مدري جبت جهدي وراها=يا شين سحرٍ يفقد العقل طوره
القت علي نظرة وفي محتواها=وش فيك مثل اللي مصابٍ بدوره
قلت الجمال اللي بعينك تباها=ومن نظرتك لي بالسهوم الجسوره
قالت اجل لو تعلم اللي سواها=كان الضرر من سبتي ذقت جوره
يا عين ابوها ضامنة في غلاها=تبيني اغرق في هواها وبحوره

/////////

((خاطره))

يا بدايات النهاية
وش تغيربالبداية؟!
يا بداية
كم فقدنا من بدايتك العناية
كم لقينا من نهايتك الشقاية
ما يهم ان جت بداية
ما يهم ان جت نهاية
.
البداية..ناقصة
النهاية..ناقضة
.
البداية..كيف ما كانت فلا تكتب نهاية
النهاية..كيف ما كانت فلا تكتب بداية
والنهاية
كيف ما كانت تكون
وش تغير بالنهاية؟!
لا رواي ولا ضمايه
لا شفاي ولا دوايه
يا نهايات البداية
وش تغير بالنهاية؟!
لا حكاية
لا رواية

//////////

((همسه))

الفلج مـن مجموع الافـلاج ينبوع=غزيـر مـاه وسـايغٍ مـع عـذابه
عسـاه دومٍ نـابعٍ ما بـه قـطوع=يـروي كـبود الوارديـن لـشرابه
ان غار قلنا يالله تعيده يـفوع=وان نار تسقي منه مزون وسحابه
ينبوعنا ما عنه مغنا ولا رجوع=كل الضمـا له والعـطش والرحابه

/////////

((خاطره))

يا رب تقبل طلبتي
يالله يا مسهِّل امورٍ عسيرات=سهل امور اولادننا والبناتي
اقبل عليهم موعد الاختبارات= اللي بذل مكِّنه درب النجاتي
يارب ساعدهم بحفظ القراءات=صح العقول اِلهُم تجي فاهماتي
من جد وابدا الجهد في كل الاوقات=لا تخيِّبه يا الله بالمقبلاتي
عسا النجاح فوالهم والشهادات=تحملهم العالي الرتب بالحياتي
ويارب تقبل طلبتي في هالابيات=يا القادر اسمع طلبتي والرجاتي

//////////

((خاطره))

يا عين
00
راحت سنين وجت سنين
ما فادت اللي بالـضنا من هـجر خـلٍ له تزين
راحت سنين وجت سنين
00
يا عين
كفي بـكا لا تـشتكين
يا عين ياللي تسكبين الـدمع فوق الوجـنتين
كفي بـكا لا تـشتكين
00
يا عين
في ذالنياحة وشتبين
حيث الـذي تـهوين أقفا قـاسي وعـيا يـلين
في ذالنياحة وشتبين
خلِّي الزعل لا تزعلين
00
يا عين
انـسي غرابيل الزمان انـسيه لا..لا.. تحزنين
خَلِّي الزعل لا تزعلين
00
يا عين..يا عين

/////////

((همسه))

حرك احساسك
يا نما ياللي لغيرك ما تعير=اهتمامـك لا يـجي نـاقص عقيم
الـتفت يمنى ويـسرى بالمسير=حـرك احساسك يجي عقـلك فهيم
لا تــكبر الـكبر للـي كـبير=والكـبير الله ولا غيره عظيم
الطغـا ويا البطر مافيه خير=لا يغرك وقــتك الليبه تـهيم
يا نما لا ..لا يجي فكرك ضرير=عامل الانسان عـملات الكريم
المماشي بـالغرور امـرٍ خـطير=من مشاها خوفي يهوي بالجحيم
والانـانية تـرى طــبعٍ حـقير=والحقير اللي يجينا منه ضيم
افهم المقصود ياللي له اشير=كـان راسـك فيه مخٍ جـا سليم

///////////

((همسه))

يا جليس الخير..
لحظة..
بس لحظة لو سمحت
شوي صمت
لو تبي تسأل أقول لك..
إسمع..إسمع
فيه صوت
صوت مبحوحٍ سمعته..مع مهب الريح جا
صوت حصني..أو حصاني
من مزاعقها بحناجرها نشوفه
أعتقد والله أعلم امغلوثه
الله أعلم امغلوثه
لا تهمك يا جليسي
لا تهمك شي عادي
هذا حر الموت فيها مبتليها
المغلث عاريات جلود تمشي من مواجعها مخفوفه
لا يهمك يا جليسي
أقرا وردك
وانا مثلك
أقرا وردي
والله الواقي من الضر اوصنوفه
لا يهمك..لا يهمك
يا جليس الخير

///////////

((قصيده))

مبروك.. مبروك
بوكيه ورد اهديه للعايله عـد=وخذ يا سعد منا التعابير عطرات
بالفرحة انلازم مـلازم محمـد=نزف زينات التهاني بالابيـات
مبروك .. مبروك التخرج ونسعـد=معكم ترا حنا نعيش المسـرات
عسا السعد فاله مديـم يتجـدد=يلقا حلاه براحة البال والـذات
الله يعينه والتوافيـق لـه شـد=بمسيرةٍ يمشي بهـا للمعـزات
مبروك له ولوالدينه ولا سـد=مبروك لاخوانه بنول الشهادات
هذا بما في خاطري ود من ود=اللي لهم بالقلب قدرٍ وحشمـات
اقولها من قلبي تستاهل وقد=وبيات شعري تبتسم لك مِحبات
الرعد 19/5/1425ه

//////////

((خاطره))

يا سلة النسيان استوعبي زود=نسيت ونسياني أبرميه في فمك
عل الذي كدر على النفس مايعود=اللي مضى حبيت انا فيه اضلمك
تحملي يا سلتي دون محدود=ابدفنك في حفرةٍ بعد ماحزمك
ودعتك الماضي وشهدت ال شهود=من بعدها ما تلزميني ولا الزمك

///////////

((قصيده))

ارسل سلامي والمحبه تخاويه=صوب الرجال اللي عريبٍ نسبها
عبر الأثير وصفحة النت تعطيه=ذاك الرفيق اللي بإسمه صحبها
ابو حمد عز المراجل تباريه=كل العلوم الغانمة منتسبها
خذ يا صخي النفس شعري مهاديه=مخصوص لك..وللربع انتدبها
اللي على بالي واعزه وداريه=له ذكريات بخاطري محتسبها
مسكن غلا الخلان القلب حاويه=والبال في ذكرالرفايق شعبها
ياما بجال الساسكو بيننا هيه=جلسة معزة..الردي ما قربها
نسمر ليال الصيف والجو حاليه=نور القمر ومذعذعه في هببها
في باطن(ن) يا جا المطر في اراضيه=طاب الزبيدي والمراعي طربها
ما جال بالخاطر يجيك وتوديه=يالنشمي.. قبل العين يرمش هدبها

////////////

((خاطره))

يازين هالريم تلعب جنب والدها=سبحان ربي منحها زين فتاني
قرة عيون الذي قلبه يمجدها=ابو محمد لها ذخر(ن) وصيتاني
الله عليها اذا لفت مناكبها=يمنى ويسرى كما ورده ببستاني
انا اذكر الله عليها الرقص مجهدها=ريمه برية عليها زي كتاني
سترك عليها الهي دوم واسعدها=بحماك عن كل ضر وشر بهتاني
يازين هالريم تلعب جنب والدها=سبحان ربي منحها زين فتاني

////////////

((قصيده))

غيمة الرعد هطلت
يا الأنامل عانقي عشق القصيد=احمليه ويحملك احلا كلام
سيريه بحرف مع حرفٍ اريد=يصنع الكلمات عذبه يا سلام
عن عباراتي انا مبغي يحيد=لازمٍ ينزع عن الوجه اللثام
الخيال يصور الشكل الفريد=هقوته في رسم لوحاتٍ تمام
المعاني مظهر اللون الجديد=ريشة المعشوق صاغتها غرام
تبتسم للي يشاهد من بعيد=والتعابير بسلاستها عظام
غيمة الرعد هطلت والما يزيد=يا عساها تروي قلوب الحشام
يالرعد ارعد وردد بالشديد=يا أنامل عانقي عاشق همام

///////////

لغز من تأليفي..

ويش شيٍ دفن بالشعر كانك عرفت=حل لي ما خفا معناه بالكاتبين
مرجهن امتماسك ان مشيت وقفت=فيه زود الشجاعة ما يجي منه لين
هو عضيد البنية ان طلع انكشفت=انك بفال طيب منت شخصٍ حزين
ثابت القاعدة تبيني احلف حلفت=انه اعلا مكانه في مكانٍ حصين
ويش يا صاح لغزي كان إنك عرفت=فنت بالعرف شاطر راعي عقلٍ فطين

وللكشكول بقيه