سلطان بن نمر القحطاني

[سالم العبيدي]

من قصائد الحكمة


يقول القحطاني هيضه صوت جاره=هيض على العين المشقاة جارها
الجار يوصي به حقوق لوازم=لو هم خباث ما ينزل وقارها
الجار والضيفان فرض على الفتى=لا بد من إبدال دار بدارها
لا صرت معسور من المال معدم=فالنفس خففها بزين اعتذارها
والعذر يقنع به من الناس عاقل=يكون نفسه ما يرى مقتدارها
وطمن عيونك لا تباهي بشوفها=ترميك في نار تقطع شرارها
والرجل لا تمهي لها في مسيرها=تخطر على روس الحيايا بغارها
فإلى نويت بديرة تيتزورها=جنب رقاق القاع واتبع غزارها
وانشد عن الي بينات فعايله=ترك رذال القوم واتبع خيارها
ولا تصاحب إلا كود من ينطح العدا=إن طار من تحت السبايا غبارها
واقنص بفرخ الحر لا صرت قانص=حتى تعود حايز من حبارها
فلا شفت من دونك إثنين تشاوروا=إذنيك علمها بكتم أخبارها
واحذر لسانك من جواب يعيبك=والعين سبر القلب والقلب دارها
لا بد من هرج طويل على القفا=وقول على اليمنى وقول يسارها
لا بد من قول على غير صايب=هرجة ردي مايميز قرارها
ندري من الزلة ونخشا ونختشي=أيضا ولا انظر جادل في خدارها
الأعمال بالنيات وللعبد ما نوى=ولا كل من ينوي على الحج زارها
هذا كلام للملبين فايدة=يفهم معانيها ويبني حضارها
ختمان قولي بالصلاة على النبي=عداد ما ينبت وتزهر ثمارها

سالم العبيدي