قصيدة ياذا الزمان

[سعيد عوده الحويطي]

اخواني اعضاء منتدى الفطاحلة الكرام اقدم لكم هذه القصيدة وارجو ان تحوز على رضاكم



ياذا الزمان اللي كثيره بلاويه=ياكثر همك يالزمان الميالي
اسقيتني من مر كاسك وحاليه=ولادام لي مرك ولادام حالي
كل يوم اقول الغد افضل وبارجيه=وارجو الامل في مقبلات الليالي
وكلما صفى لي يوم وزانت مواريه=جا له نهار وغيره بالتوالي
عندي يقين الرزق ماحد بيعطيه=الا الذي بيديه فضل النوالي
اللي جميع الخلق متكفل فيه= وموزع رزق لبشر بالعدالي
وصبرت وارجو الصبر تحمد تواليه=والصبر مفتاح الفرج والامالي
ومن شافني يقول وقته مصافيه=وهموم قلبي تمتحني لحالي
واخفيت همي عن عدو شمت فيه=واخفيت همي عن صديق موالي
خوف العدو اللي همومي تسليه=والا لصديق اللي بلومه اذلالي
وصبري على نفسي وهمي مداريه= افضل من الحاجه لبعض الرجالي
اللي جمع ماله يعده ويحصيه=ولاهمه الاكيف يكسب ريالي
هويحسب ان المال يديمه ويبقيه=مخلد على الدنيا بليا زوالي
وناسي ان العمر له يوم قافيه= ولابد له من يوم تدني الاجالي
ونهايته في قبر ترابه يغطيه=قبر هيال ومقتفيته اهوالي
المال يذهب وسود الايام تفنيه= ولاباقي الا طيبات العمالي
واللي بذل ماله على شان عانيه=يفوز في كسب الثنا والمعالي
واللي بخل بالمال ماهو بمغنيه= والجود ما يفقر كريم السبالي
واللي كتبه الله للعبد ياتيه= وماله عن المقسوم درب ومحالي
يالله ياللي دايم الدوم نرجيه= الطف بحالي ياعليم بحالي
انت الذي في كل الاحوال ندعيه=وانت الذي دايم عليه اتكالي
يارب تهديني على الحق ماخطيه=مادام باقي لي بعمري مجالي
وصلاة ربي عداد فرض نصليه= على المصطفى الهادي نبي الكمالي