ديوان مرشد البذال

[الطائر المهاجر]

قل لأبـو نـواف مافيهـا عـذار=إنتويـنـا بالسنـافـي للمسـيـر

2 كان أبو نايف تحصّـل لـه مـدار=دوره وإلا دفعنـا لــه بشـيـر

3 قل لأبن عون الوعد تالي النهـار=بالمثلـث لايـسـج ولا يحـيـر

4 إعتجل يـوم الهـوا ذعـذع ودار=إترك الراضه وعذرن فيـه ميـر

5 كان عندك بالبنـاء تالـي جـدار=أجلـه والعيـد مافيـه إتعمـيـر

6 يم أبو سلطـان عـزم الفكـر دار=يـم غيـره لا تقـول ولا تشيـر

7 خلهن يمشـن مـن الديـره لـدار=المواتـر صافيـه والـدرب قيـر

8 مثل ابو سلطان لـه حـق يـزار=جيتـه بالعيـد مظهرهـا كبـيـر

9 سجتن عنـده تزيـد بهـا العمـار=يدله الخاطـر ويرتـاح الضميـر

10 في محل كـد جلسنـا بـه مـرار=مدهـل الحكـام والزاعـل عثيـر

11 مجلـس يؤخـذ بعيـن الأعتبـار=صاحبه ياعز منهو لـه عشيـر

12 دلـة فيهـا مـن الحبشـي بهـار=ومنسف يشبع ضيوفـه والقصيـر

13 نادر له نطحت الموجـب شعـار=فاهمـن بالمرجلـه درس غزيـر

14 ما لبس ثـوب الشهامـه مستعـار=وارث طيبه مـن الوجـه السفيـر

15 أحمد اللـي لـه تواريخـن قـرار=بالكـرم وبسلـة السيـف الشقيـر

16 إنشـد التاريـخ يعطيـك إختبـار=عن تواريـخ السديـري بتعبيـر

17 أقـر ديـوان الخليفـه كـان دار=شف مقاله عنـه بالخـط الأخيـر

18 شف مراكيضه على قـب المهـار=يوم سفك الدم غـادن لـه هديـر

19 كان أبو سلطـان همساتـه كبـار=تابعن عـود علـى دربـه يسيـر

20 والعلوم كبـار وأحلاهـا القصـار=زبدة الموضوع وأحـلاه القصيـر

21 مابنيـت الملحمـه بيتـن جـدار=كود ناسبهـا علـى فعلـن شهيـر

22 كان للمعروف هالوقـت إشتهـار=السديري مع هل الجـودا خشيـر

23 ما بنى السمعه على ملس العـذار=ما بناهـا إلا علـى فعلـن ثميـر

24 أنشد اللي سمـع بفعـول الكبـار=نور الأول يقتبـس منـه الأخيـر

25 يوم وقتي عقب أبو زيـد إستـدار=إجتبرت بجابـر العظـم الكسيـر

26 شمت للي فيـه خصلاتـن إخيـار=الذكى والدين والعـرض الستيـر

27 لـي بربعتهـم معـزه وإفتـخـار=ربعـة الطيـب تنسيـك الحقيـر

28 أفهم الطيب الخنيني مـن البخـار=يوم فاح المسـك شميـت العبيـر

29 قالها اللي له بعرف النـاس كـار=يفهم الشبر الطويل مـن القصيـر

30 الرجال طيور توصـف للحـرار=كل طيرن فـي جناحينـه يطيـر

31 وين طيـر يحتريلـه كـل جـار=وين طيـر مايصيـد إلا الشعيـر

32 لو تقـول إن الشجاعـه بالطيـار=كان فضلنا القطـاه بمـا يصيـر

33 وين طير وإن هوّا شـق الستـار=وين طير يذعره صـوت الصفيـر

34 النداوي له علـى الصيـد إقتـدار=والحمامـه بالمـحـل وتستـديـر

35 وإن جهلت الزين والجنس الدمـار=إنشد اللي فـي معرفتهـن خبيـر

36 أخذ لك منـي كلامـن بإختصـار=فرق بين الصوف من سلك الحرير

37 فرق بين الحب وأنخـال الشـوار=أصلهن واحد لاشك الـذوق غيـر

38 ربعة الطيـب تزيـدك بإنتصـار=ترفعك رفع العمـد بيتـن نظيـر

39 والردي عرفه مثـل بيـر هيـار=تنقبـر فيهـا ويدفنـك الحفـيـر

40 حقة الطيـب تجيـك مـن الفقـار=والردي يعطيك كرسـوع البعيـر

41 لا ترابـع واحـدن بالعهـد بـار=وإن وفى له مـرة خيـره كثيـر

42 التجـارب خلهـا لـك مستشـار=لاتبي غير التجارب لـك شويـر

43 لاتجـي مدخـل يدينـه بالخبـار=مالقى صيده لقـى دابـن ضريـر

44 والرجال إبهم فهـد وإبهـم حمـار=وأنت فكر بالفهـود مـن الحميـر

45 وانت في دورك عليك الـدور دار=لاتحسـب إنـك مخـلا يالفقـيـر

46 وقـر العالـم وتلقـى لـك وقـار=وإن حقر حقرت لوك إبـن أميـر

47 والشرف لايستـوي فيـه إنهيـار=الشرف هو مقضب السيف الشطير

48 والقناعة مرجلة والضعـف عـار=وأطلب النجدة من الوالـي القديـر

49 لاتجـي للنـاس طلباتـك إكثـار=كـل ديـوان تجـي يمـه مغيـر

50 ما خبرنا بأهـل الشحـذه تجـار=غير فقره كـل نفـس لـه تعييـر

51 خل عـز النفـس للعـوره ستـار=لو فراشك في طرف بيتك حصيـر

52 وأنت للعـوده مـن الله بإنتظـار=واحـدن مالـه وكيـل ولا مديـر

53 مـدة الله تمتلـي منهـا النـقـار=تجعـل الغـدران بالملـزم تحيـر

54 يجعل الوادي مريـف بالخضـار=عقب ماهو يابـس قشعـه هشيـر

55 الكريـم معـان والفـارس مجـار=مـدّي الواجـب ونطـاح الذخيـر

56 الغنـى بالـذل مذمـوم مــرار=والفقـر بالعـز لأمجـادك يثيـر

57 طربة الدنيـا مثـل لعـب القمـار=لو جمعت المال شفت تالي المصير

58 لو جمعت من الذهب حمل القطـار=عند نزح الروح ما أنت بي له دبير

59 صار بين الوارثيـن بـلا مشـار=ينعزل حق الكبير مـن الصغيـر

60 وأنت حقك خامتـن عشريـن وار=ذيك هي حقـك ولا فيهـا خشيـر

61 فصلوا منها الكفن هـو والـوزار=إقرشوا بـك يـم مثـواك الأخيـر

62 وإسدحوك بحفرة في وسـط غـار=يطـردك منكـر وقدامـك نكيـر

63 واهني اللي مشـى طلـق شكـار=سالم من ظلم عمر ومـن عميـر

64 لـوّه بالدنيـا بحلاّتـن إعـسـار=يرتجـي بالآخـره فرحـة نظيـر

65 مـن رحمـة الله وقبلـن العـذار=رحمة الله تغفـر الذنـب الخطيـر

66 والأثيم من الصراط أقرش وعـار=وإن سلم من ويل طاح بزمهريـر

67 ياإلهـي كـان مـافـيّ إقـتـدار=ألتجي في رحمتك وأنـت المجيـر

68 الشباب أقفى وأنـا بآخـر نهـار=وأرتجي فزعتـك يانعـم الشويـر