دار تعزك اذا ضاقت بك احوالك

[الطائر المهاجر]

دار تعزك اذا ضاقت بك احوالك=في ديرتك خير من دار بها اذيه
وان كان تبغى السلامه انت وعيالك=اقنع برزقك ولو واحد من الميه
كلٍ يلاقي جزاه بيومه الحالك= يمرض ويرحل بلا مال وذريه
ودامك بأمن وأمان فطيّبٍ فالك= طالع لغيرك ببلدانٍ عربيه
حتى ولو ينسرق موترك وجوالك= الأمن مشغول في طرد الارهابيه
وحتى ولو عاطل منتاب بالحالك= مثلك كثير من رجالٍ شقرديه
وحتى ولو جايعٍ بعض الفقر طالك= يمكن تلاقي لحم في عيدالاضحيه
لاسلم عودك زمانك يرجع لحالك = فسلم امورك لربٍ يعلم النيه
وان مت من جوع ماثقلت شيالك= لكن بلا ذل لاوغادٍ وواويه
من كل متغطرس يصفعك بنعالك= يبيك عبدٍ ذليلٍ في قهاويه
من شان تلقط فتات يوم يرمى لك= كلبٍ يحرسه من اللي ماشيٍ زيه
موتك عزيزٍ بنفسك يوم ترحالك= ولا يقال عبدٍ توفى لاجل ربيّه