من رواد الشعر النبطي رميزان بن غشام

[الطائر المهاجر]

دنياً تفيـض ايامهـا واشهـورهـا=واسنينها تسقي الرجـال امرورهـا

لا خيـر في دنيـا صفاهـا ساعـة=عقـب تبـدل ما صفـا بكدورهـا

قد فرخت فيهـا الدجـاج ورزّزت=رايتهـا وابنـودهـا بقصـورهـا

واشـوف فيها اللاش يمشـي آمـنٍ=والحّر ما هـوب آمنٍ من جورهـا

يبغي المتـاع ابها ولا هو حاصـلٍ=وكيف القـدا يرجيـه من سنورهـا

لو لا انهـا دنيـاً تشيـب اطفالهـا=ما كان يخشى الباز من عصفورهـا

دن الــدواة ودن لـي طليحــةٍ=اكتب بمبـرى اليـراع اسطورهـا

الله من عيـنٍ إلـى نامـو المـلا=جزت لكـن التوتيـات اذرورهـا

متذكرٍ عصـرٍ مضـى لي فايـتٍ=ما قلطـت فيه الوشـاة اسبورهـا

مع طفلةٍ تسبـي الفـؤاد بضحكهـا=مثل ابتسـام البـرق في ديجورهـا

مخموصة الأقـدام ناعمـة الحشـا=كتـفٍ وردفٍ والهفـا بخصورهـا

ديجـانــةٍ دجـرانـةٍ سكـرانـةٍ=تسوا العراق وشامهـا وامصورهـا

وصنعا وبيشـه والحجـاز وينبـع=وملك النصـارا واليهـود ودورهـا

تشبه قمر خمسٍ و خمس مع اربـعٍ=بدر التمـام وجـل خالـق نورهـا

لولا اللبـاس وطوقهـا واحجولهـا=لقـول خشـفٍ رائـع بقفـورهـا

تنهب اقلوب العاشقيـن إلى رمـت=عنها الخمـار وجلجلـت بقمورهـا

ما اظن في البيض العـذارا مثلهـا=لا الحـي ولا اللي ميـتٍ بقبورهـا

ولّعت فيها وارخصـت لي ماغـلا=حتى غديـت بطاميـات ابحورهـا

فالـى نصيتـه جنـح ليلٍ قال لـي=من ذا الذي ما هاب من ناطورهـا

أنا الـذي يا شـوق جيتـك عـازمٍ=افضـي البلاد ولو حديـدٍ سورهـا

يا زيـن لو بينـي وبينـك عسكـرٍ=زرتك ولو حـاذرت من مقدورهـا

قالـت لنا بك خاطـرٍ من قبـل ذا=واليوم جتك الروح وابدت شورهـا

واحذر ترا حولي وشـاة وغيرهـم=ابطال واحذر لا تجيـك اشرورهـا

قلت ان حد السيف يقعـد من طغـا=من ناش تاكلـه الحـدا وانسورهـا

الى ايتفـا سيـف وقلـبٍ صاطـي=راحت جمـوعٍ كيدهـا بنحورهـا

راحـت وانـا بوصالهـا متبجـحٍ=كنـي بجنـات العلـى وانهورهـا

يا عاذل القلـب المصـاب بحبهـا=احلـم فـلا للنفـس عن مقدورهـا

عجـابـةٍ لعـابــةٍ مـزاحــةٍ=تشوي افـواد القلـب في تنورهـا

معسـولـةٍ مدلـولـةٍ مجمـولـةٍ=من حسنها توضى نواحي سورهـا

يـوم ايتفينـا بالمنـام تصـرمـت=غبـر الليالـي واقبلـت بسرورهـا

جتنا عجـوز البيـن كن اعيونهـا=هـرٍ تنـاقـر سرهـا بحجورهـا

نـاريــةٍ عمليــةٍ شـريـــةٍ=وابليس شفتـه راكـبٍ في كورهـا

سعـت بفـرقـا لامنـا وشتـاتنـا=ودزت الحراس القمـاش انذورهـا

ياحسرتي من عقب فرقـا صاحبـي=واتعبت نفسـي لو دنـا محذورهـا

واهنـي دعبـولٍ بنـومـه سابـحٍ=ما ذاق عرصات الهوى وازمـورها

ولا شـد مجـدولٍ طويـلٍ ضافـي=والاّ قذلت بالزعفـران اعطورهـا

وصـلاة ربــي للنبــي محمـد=ما عنت الورقا بـروس اشجورهـا