عبدالله بن صقيه

[الطائر المهاجر]

عديت في رجم طويل مسيان = ياما على روس الطويلات عديت

مانيب والله يوم اعديه طربان = متضايق دايم زنيت وتناهيت

ازنيت زنيت اللي من الزهد زهقان = وانهيت نهيت اللي تنهت على هيت

يا قلب يا اللي بلهواجيس غرقان = اترك كثيرات الهواجيس ياشيت

لاتبحث المكنون والصدمليان = لى دك هاجوسك من النوم فزيت
ذالي ثمان سنين يا حيف وجعان = لوليت تبري علت قلت ياليت

لا شك قولة ليت للرجل نقصان = اما حصل لي مطلبي مت ما ابطيت

الى انفتح للشعر بالصدر بيبان = تراسلن كالورد بيت ورا بيت

ماني على نظمي للاشعار شفقان = كثير ما الوي قافيهن لا استحسيت

انشي واعايرهن بفكر بميزان = من قول شعار العرب ما استمدتيت

وان عدوا الكرمان ذربين الايمان = يما بدلوي مع هل الطيب دليت
لاهين من يصير على الضيم ما اهان = اهل العطا من مدهم ما تحريت

ورزقي على الفرد الصمد عالي الشان = من غير خلاق البرايا تبريت

من يبذر المعروف بالنذل خسران = يابا ذل المعروف بالنذل ما اقديت

وخلاف ذا سويت بن برسلان = وادنيت مصقول وفكرت وانشيت
قم يانديبي فوق جلاي الاحزان = جمس يدني نازحات السباريت

توه بحينه وارد غالي اثمان = راعيه بالمعيار ما عاير الزيت

ارفق عليه ولا حظه قدر الامكان = لاتدعس البنزين يتلفلك ما ابطيت

الخط قار راسي تقل صوان = لو تفتح الفريون بالقيظ شتيت

من الصفرة مد والصبح ما بان = من ديرة اجدادي لدرعى تنحيت
علم على التسعين وانظر بالاعيان = تشوف منقاد الجبل لى تضاحيت
انحر تميم مذبحه قرح الضان = اصل الكرم فرعه ليوث عناتيت
ناس لهم ذكر وصيت وعنوان = يرعى بهم نزال بجوارهم هيت

لاجيت بين سلمى ورمان = عرج على السبعان ديرة هل الصيت
ترثة مفيد العمروي مروي الزان = فعل عليه شهود صدق وتثبيت

اهل الصخا والجود ماهنب بخلان = كسابة الطوالة وبال الطواغيت

وربعي هل الروضة الى خان من خان = واهل الغزالة جمع ماهم شحاتيت

اهل الجمايل من الحماضا وحمران = حريبهم بالليل نومه تفاويت

وأهل الحفن والمستجده إلى حان = وقت اللزوم وعن مرابيك جليت

يسقون اعدايهم من المر كيسان = بايمانهم ما هوب خرط وسفاريت

ولاتنس نسل المنقري حبس الاضعان = سعيدية تفرح بهم كان ضديت

واهل قفار موجبة كل جوعان = بغبر السنين يقدرونك الى جيت

واهل السليمى لى طولن غبرالازمان = وراعي سميرا الشبرمي لى تقاصيت

ولد وهيب اللي جدوده لهم شان = ما ريته طلق حجاجه الى الفيت

واهل المهاش ان صفيت غرالامزان = اهل الجمايل كل ما جيت حييت

واللي بموقق ما يذلون عيان = واللي بضرغط تعجبك لى تنخويت
والقصر يسقي جوبته وبل هتان = للي بحيه ساكن ما تناسيت

واهل القصير مرويه كل عطشان = عطشى السيوف اللي بكف الصاليت

واهل جفيفا بالكرم ورث جدان = عيال من بالطيب باخباره اوحيت

ومر ال صقيه مخلصة كل ديان = ذباحة الحايل بليا تلافيت
اللي بحايل قصرهم حول برزان = واللي بجنبه منوتك لى تمنيت

نعم باهل جبة سلالات كرمان = رمالات في مدحي لهم ما تزريت

والبكر والفايز منى كل عمسان = وم الجراد وحثهم لا تهقويت

ومر العوض منصى المطاليق جبلان = تمايمة في جدهم ما استشكيت

ومر الرحبين بالجوف ظفران = تفرح بهم كانك على الضيق حديت

جماعه الساطي حليف بن عرسان = في جنه الفردوس ياخليف عليت

جدك تنزح من قفار على شان = كسب العلا وانته على الجد عليت

يا العمروي يا مروي السيف دابان = ترويه من دم العدا لى تعزويت
تميمي تصبر على كثر الاكوان = وعن متعلبين الجيش ما قيل صديت

بعدين يالمرسول كيفيت الاوهان = ومن شر صدفات المقادير كيفيت

مر القبور اللي بها طيور حوران = سلم على من كان فيها ولو ميت

زيد الخوير وناصر بن لحيدان = يفرح بهم من ضافهم بالاواقيت

يلقي اللقيمي فوقه اذناب خرفان = وذلال ونجور رفاع الاصاويت

وراعي جفيفا مفني ضان عثمان = بن مفيد اللي بنى للفخر بيت

وتركي الى حمى الوطيس الربيعان = ابو اليتامى شايع الصيت والبيت

وعقيل مشهور القبالى بهيجان = راعي النبا الطيب عليه استدليت

والشبرمي مرشد سلايل كحيلان = بقصيص سيفه شتت الضد تشتيت

واللي هزم جمع الحريب ان عفنان = دواس مسقى الضد بالحرب حلتيت

يا ويل من هوله فنا المال ديان = غلطان يااللي لابن عفنان عاديت

وسلم على ربعي كهول وشبان = لاشفت بيضان الوجيه اسفهليت

بني تميم الى عوى الذيب سرحان = تامن بهم يااللي عليهم تسميت

في مدح ربعي بالجبل نسل عدنان = عز الله اني قاصر ما تقصيت

وشمر الى رد البرا نسل قحطان = افخر بهم نعم بهم ما استبديت

قحطان نعرفهم بحمير وكهلان = والله ما عمري للاجواد ذميت

الذم ما يسقط للاجواد حقان = لو قيل سقط حق الاجواد عييت

مااناب بالدنيا نبيع للاديان = عن كل ما يدني لشك تحاشيت

تكفن يا الترفات يا نجل الاعيان = شومن عن اللي غافي تقل خرتيت

يااللي هدب نجلك كما ريش غربان = في سوق بياع الذهب ما تمشيت

ياغصن موز نام وصط بستان = من اي ما هب الهوا بك تثنيت

وخد كما بدر يشعشع إلى بان = نظيف جيب للعشاشيق ما اغضيت

ابو ثمان كنها حب رمان = او قحويان في محاني سواريت

شم يا حسين القد يا مطرق البان = للي الى لذت بذراهم تذريت

تميم دوح المجد ممتد الاغصان = أهل الشرف في مدحهم ما تخفيت

ما ناض برق ورف طير بجنحان = على النبي سيد المخاليق صليت