محمد الفيحاني

[الطائر المهاجر]

امانتكم لها


شبعنا من عناهم وارتوينا=وعند رسوم منزلهم بكينا

وعقب فراقهم شنا وحنا=وحنينا وثم انا عوينا

وسايمنا وساقمنا وحنت=لنا حتى المنازل والعنينا

ونادينا وقلنا خبروهم=ترانا من محبتهم نعينا

وثرنا من مفارقهم نحلنا=وكان فراقهم طاول فنينا

الى جيتم منازلهم فقولوا= لهم باقوالنا يا راحلينا

ولاتنسون ماقاله محمد=امانتكم لها يا حاملينا

ترانا للذي قالوا سمعنا=وباللي هم بغوا منا رضينا

وكل شروطهم نقدم عليها=قدمنا باللي فنوا علينا

وثرنا من مخالفهم رجعنا=وهونا عقب ماحن عصينا

وثرنا في محبتهم حفرنا=وسيسنا ومن فوقه بنينا

وثرنا في محبتهم ربطنا=ووثقنا وثر فيها عضينا

وثرنا في محبتهم سكرنا=وتيهنا وثرنا مهتدينا

وفيها آه واويلي غرقنا=وهدينا الجدا وبها سنينا

نخينا من يذكر بالمروة=ولاهل الذات والشيمه عزينا

تكلفنا وهم عنا براحه=وذبنا وهم عنا غافلينا

وناموا وارقدوا واحنا سهرنا=عليهم وهم رويوا والتظينا

وهذا الحب بالزفرات يشوي=الا ياويلكم ياعاشقينا

يلين من المحبة كل قاسي=ولو قلبه حجر يازي طحينا

وانا من حر فرقاهم عليهم=تعلمت النياحه والحنينا

أرى راعي الهوى حتى هلكنا=ولولا الحب ما والله لعينا

ولا نحنا ولا صحنا وقلنا=لكم يا اهل الموده خاضعينا

ولا قمنا نسال الوصل منهم=وحنا لا نبالي لي عطينا

برمنا وافتلوا هيهات نقضي=وهم لي من برمنا فاتلينا

اقول ايش لون ياهذي مصيبه=وسواها الهوى ياناس فينا

انا مادري ومن يدري متى هم=لنا عقب التعذب راحمينا

ومن النار لي عذب يسامح=ويخرج من له الأسلام دينا

وحنا في تعذبهم خلدنا=عجب والله وحنا مسلمينا

وراهم ماعفوا والعفو سنه=علام قلوبهم عيت تلينا

افكان نفوسنا زلت وعالت=واخطينا وكنا مذنبينا

فحنا للعفو منهم طلبنا=وفي حد القصاص لهم مشينا

وتبنا من عظيم الذنب تبنا=لوجهك ياغفور التائبينا

حلفنا مانعود بعزة الله=وغلظنا علينا بالف دينا

برب البيت والكعبة وزمزم=اله العرش رافع طور سينا

حشى لله مانخطي عليهم=وان عدنا فانا ظالمينا

وان نكذب فان الله ربي=يقول اني لعنت الكاذبينا

ومن يمكر ورب البيت ضامن=ومكره فوق مكر الماكرينا

الهي اسالك ترحم محمد=بجاه المصطفى والتابعينا

اسالك بالزبور ومن نزل له=وبالقران وايات تلينا

بتوراة على مسوى سالنا=وبانجيل على عيسى دعينا

تلامي ماتفرق شملنا=وتجعلهم علينا راجعينا

على ان عودوا ستين ليله=اصوم ايامها نذر يمينا

وكان استبعدوا عنا وقفوا=وعافوا قربنا لما دنينا

ترانا مانقاطع في وصلهم=نواصلهم ولو هم قاطعينا

نصافيهم على طول الليالي=ولو ماهم غدا كدر وطينا

ولا والله ننسى لو نسونا=على طول الليالي والسنينا

ولو قلنا بننساهم كذبنا=وقل الصدق منا وافترينا

قطعك الله ياروق تغنى=تذكرنا ! على بالك نسينا

فلو ابطت بنا الدنيا وطالت=حشى لله ماعنهم سلينا

ولا فيهم نلين لقول عاذل=ولانسمع ملام اللائمينا

ولو هم بالموده بدلونا=فلا حن عقبهم متبدلينا

عساهم في الرخا لو عذبونا=نراهم في النعيم مخلدينا

طووا عنا كتاب الوصل وحنا=بيبطي عن وصلهم ماطوينا