مرثية في والدتي

[نجم الإبداع]

مرثية في والدتي جعلها الله في عليين


ياقبر ياللي يسكنك مهجة قلوب=حظك كبير وساكنك فاقدينه
عليه دمع العين لازال مسكوب=وموته جعل قلبي يبيح كنينه
صحيح شوفه صار ياقبر محجوب=لكن ذكره ماتحجبه سنينه
وصحيح عمره كان ياقبر محسوب=لكن في فقده علينا غبينه
ماهو جزع لاشك والموت مكتوب=ولاشك درب كلنا سالكينه
عزيزة ماتت لها نادر اسلوب=وفيما يخص الدين كانت فطينه
بأقسى مرضها والنفس كان معطوب=مابينت للناس كم هي حزينه
ولارتاح راس من المرض كان منصوب=حتى المخده ماشتكت من ونينه
تردد الأذكار والجسم مضروب= ماتت وهي لله ترفع يدينه
يالله ياللي خذتها تقبل التوب=وتقبل صلاة امي ودعوة جنينه
وتغفر خطاياها وتمحص اذنوب=ما فيه غيرك يالولي مرتجينه
وتجعل منازلها كما منزل أيوب=اللي صبرت صبره وهي في سكينه
وصلاة ربي عد ماينبت حبوب=على نبي مسلكه مهتدينه

رحمها الله رحمة واسعه والهمكم الصبر

وصح لسانك على المرثيه الوافيه يابو محمد

وهذه طريقنا

لاهنت