يا سعود يامالك خيار البعارين

[عبدالمحسن الرحمه]

يا سعود يا مالك خيار البعارين=نوادر*ٍفيها الحسن و الجمالي
مالكتها من شيخ وافي المحبين=أبوك راع الطيب بأول و تالي
يابو حبيب الشيخ يامالك الزين=صفوة مزاين سعرها بالعلالي
جعد*ٍ وبرها كالبرد تبهج العين=عَريِضةْ الخدّه لها القلب مالي
طول اللحيّ ميزة وخُرع الأذانين=سبحان خالقهن عظيم الجلالي
لأدرهمن مدّن رقاب*ٍ مزايين=كأنها تطرد جراد*ٍ بعالي
عرقوبهن يسحر مثل شكل قوسين=مشرابهن يشبه مصب الدلالي
أخفافهن تشبه لختم السلاطين=فيهن هداوة لأرعن بالمفالي
طول الغوارب ذيلها دون شبرين=فجّ النحور ابمشيهن بعتدالي
راس*ٍ عريض امجمل*ٍ كامل الزين=عرقوبها هزعا تزين مقالي
سنّد الرقاب أشكالهن تسحر العين=سنامهن متْوخّر*ٍ كالجبالي
سفن الصحاري حبها بالشرايين=تصبر على الميراد عدّة ليالي
حب الأبل ساري بدمك من اسنين=تسامرك في حلكم وارتحالي
قومك بقوم منزحين المعادين=شجعان ابوقت الحرب مابه جدالي
والضيف لاجاكم فزعتوا مهلين=قوم*ٍ كرام اتقلطون الجزالي
لك الفخر ياسعود نسل الشياهين=تفخر بعمك من كرام الرجالي
شيخ*ٍ علا صيته بكل الميادين=مبلش وفيّ الطبع راع*ِ الخصالي
مالك مزاين سعرها بالملايين=فيها وصوف الزين شي*ٍ خيالي
يا الله عسى رب المخاليق آمين=يبارك الله لك بكثر الحلالي
أبذكر الله عن عيون الشياطين=ذكر الله اللي يحفظ ابكل حالي