لاجتك غلطه من عزيزٍ تودّه

[الطائر المهاجر]

لاجتك غلطه من عزيزٍ تودّه = وانته تعرفه من قبل باتزانه
فحاول تفهّم حالته وقت شدّه= يمكن تغيّر وانت تجهل بشانه
ويمكن بلحظات الغضب جاك مَدّه= وشملك مع غيرك بزلة لسانه
فدور عن الأسباب حوله وحدّه= يمكن يعاني ضغط هزّ لكيانه
انصحه يتعالج فضغطه يهده= ويجعله ما يدرك لهرج الرعانه
واطلبه يتعذّر ولو بعد مُدّه = فالعذر من طبع العقول التكانه
وان كان كابر فاهمله لاتعدّه = مثل الصفر يسراك ماله مكانه
ماني من اللي لا انصفق دار خده= وماني من اللي يرتضي للمهانه
حرٍّ ولد حرٍّ بجهره وسده = الحق سيفه والعداله حصانه
ومن لاحكم نفسه بهزله وجده = يدفع ثمن غلطته بآخر زمانه