ياسلام الله ..

[هترل]

ياسلام الله على ذيك الليال =يوم كنا بالفقر مستانسين

ما حسبنا حساب درهم او ريال =همنا نرضي اله العالمين

نكرم الضيفان , ونمد الوصال =ونرخص الارواح دون المسلمين

نهجنا القران ما فيها جدال=وسنةالمبعوث سيد المرسلين

عايشين بخير في احسنه حال=ما يكدر صفونا ضيم السنين

رغم قل الحال ممشانا عدال =ما عرفنا اللمز والحقد الدفين

ننصر المظلوم لا جاله مجال =ونقسم اللقمه مع المستضعفين

ما نهاب الموت في سلم وقتال =يومنا بنهج النبي متمسكين

كان فينا العود يضرب به مثال =نقتدي به بالشمال وباليمين

ما يفرقنا سفيهين الخصال =لو غزونا خاب فكر المعتدين

ما نوطي الروس لا بالله محال = إلاّ للخالق لغيره ماندين

نعشق الميدان في وقت النزال =سيفنا البتار للظالم يبين

عزنا الاسلام به نهدم جبال=مالنا عزه بدونه , ذا يقين

ومرت الايام وسنينٍ طوال =وحنا عن ذيك الفعايل غافلين

همنا اصبح لبس طاقيه وعقال =ما نفكر غير في الكبش السمين

نحسب الدنيا رصيد وزود مال =نتبع الدولار و إبليس اللعين

ابتعدنا عن مضامين الرجال =وابتغينا للحضاره طامعين

كيف كنا وكيف اصبحنا السوال=والاجابه بد يفهمها الفطين