مصافحة الصبـــــــــــــــــاح

[فارس القوافي]

السلام عليكم
صبحكم الله بالخير


الصباح ابدونها ماهو صباح = ماعرفت الصبح دون اوصالها
يوم غابت صرت مكسور الجناح = ضايق ٍ صدري وشوقي جالها
ليتها ترجع وتشفي بي جراح = كنت متعوّد تشدّ احبالها
زايدٍ بالوصل لكن طاح طاح = وصلها واصبحت ادوّر شالها
راحت وقلبي تزايد بالنياح = وانكسر بي خاطرٍ يسعى لها
ليه تقفي يوم قلبي به رماح = مادرت وشلون صبري نالها
لي ثلاث سنين سارح بالوشاح = ودّي ااقطفها ونطعم فالها
مير صدّات الزمن دايم جماح = ماقدرت اصبر واهدّ افعالها
اكتم ابقلبي والمّح للرياح = يمكن البذره تطير اقبالها
يمكن اتحسّ الغلا وقت المراح = وين كان العقل واسكن بالها
ادري ان الوصل ماهو بالصياح = القلوب اللي تحدّد جالها
وجالتي ابعد من افكار الصحاح = يمكن الصاحي يصير اشوا لها
لنّي المجنون شاعر جا وراح = يكتب ابياته على شلاّلها
وان طلع له صبح يطلق له سراح = وينجرح في غيرها لو شالها
عاشقٍ والوقت يلقى له براح = كم بقلبي عاش قبل احلالها
وان جرحني بعدها هذا الصباح = باكر انسى كيف كان اوصالها