غمرة الوقت

[ساهر الليل]

يالله يامنشي سحابٌ وهمال=والليل واسراره وسحر الغروبي
ومسير الافلاك ومغير الحال=اغفر لي الزله وجملة ذنوبي
ماعادني قاوي على حَمل الاثقال=الجسم ناحل والمنايا تنوبي
اشقيت روحي بين هقوات وامال=اضحك مع الايام واخفي شحوبي
واليوم جاني من هوى البال مرسال =نقض جروحي واحتوتني الهبوبي
اقبل وانا بين المدارات ! مختال=مصوّب النظرات بالحيل صوبي
وارسل سهومٌ غايره فوق الاحمال=اللي زماني ساقها لي غلوبي
من قبل يسقيني الصبابه بفنجال=ذاب الحلى والمر في وسط كوبي
وتعانقك نبضات وانفاس وانفال =مابين خفاقه وصدرٌ رحوبي
لكن ما اسرع ! قبل تصنيف الامثال=قفل مواويل الامل في دروبي
وارتاع من لمحة عيوني بمدهال=وانا معه في غمرة الوقت دوبي
شرع لي الغمره مع طولة البال=واشعل بها بين الحنايا لغوبي
قلت العفو !! ماني للاسباب ميال =اعرف شراب الكيف والقى شروبي
واقطف زهور الوجد بايمان وشمال=والى حداني الوقت غيرت ثوبي