بعض العرب ودك على الراس تكويه

[الطائر المهاجر]

اطلعت مع الأسف على ما دار في الساحة الشعريه من هجاء بين بعض الشعراء
بسبب بعض الاختلافات في وجهات النظر السياسيه بين بعض الدول ، لأجد ان الشعر
خرج عن مساره الصحيح واصبح اداة تفرقة بين الإخوه ، دون ان يدرك هؤلاء الشعراء عمق الروابط رغم بعض الاختلافات العابره



بعض العرب ودك على الراس تكويه = لا دحدر بشعره لمنحى سياسي
وقام يتخبط مادرى وين رجليه = تاخذه في درب عسير المراسي
يفتح فمه والحرف ماهو بواعيه = ويدخل بامورٍ دوم فيها التباسي
ويبدا يهايط شان تملى اياديه = من شرهةٍ واعجاب بعض الكراسي
اللي تقارب لو تباعد بعد تيه = فالمصلحه تحكم تغير لباسي
يحسبه في وقتٍ قديمٍ بماضيه= وقت الفرزدق مخطيٍ بالقياسي
ومن دقق النظره بشعرٍ يثاريه = يلقاه هرج بزور ماله اساسي
لا وزن لا معنى وحتى قوافيه= تكرار لا فيها طباق وجناسي
ياحيسفا فالشعر ضيّع مفاليه = ومن فق فمه صار شاعر نطاسي
الشاعر البيطار يرفع مناحيه = عن كل سقطه تجلب الانتكاسي
يخلي السياسه لاهلها لو تناديه= فماكل من يسبح برع بالغطاسي