عفوا حبيبى

[حرف وشعر]

ماعاد لك فى خاطرى ود واعتاب= دام المشاعر فى جنابك توّفت
ونهر(ن) جرى لك وارتوت منّه اهضاب= امحل وبعده كل لهضاب جفّت
ليت الذى جاب الهوى فيك ماجاب=وليت العيون اللى شافتك عنك عفّت
اقدار مكتوبه مع الوقت بكتاب=واقدار ربى حاصله لو تخفّت
واليوم انا ودعت حبك على الباب=والنفس عن ذيك الجهالات كفّت
سرت بغرامى فيك اركض وانا شاب=واحمل احمولك عنك ثقلت وخفّت
واروح انا لك فى مراضيك طلاب=واسوق عمرى سوق لك ماتلفّت
وان هل دمعك من على الخد سكاب=ماجف دمعى لين دمعتك جفّت
واسهر معك وانسى معك كل لحباب=واسمر معك ليل(ن) به الروح شفّت
واحفظ لك اعهود ومواثيق واكتاب=واوفى معك لو عنّك الناس جفّت
واليوم تجزانى بلا جرم واسباب=من بعد ماريح الجفا فيك سفّت
تعال وانظر جرحك اليوم ماطاب=يوم اطعنتنى فيه كفك ووفت
عفوا حبيبى مابعد باقى اعتاب=مشكور انا نفسى ترى عنك عفّت