ياللي غرامك والهوى شي ثاني

[نجم الإبداع]

ماحلى كلامك لي وشطحة سوالفك=والا جمالك في النساء شي ثاني
ياملهمه قلبي انتشى يوم صادفك =ومن قبل اشوفك كان قلبي يعاني
هني من بين المخاليق والفك=حقق مع اهل الحظ كل الاماني
كن الصبا لاهب نسمه يلاطفك=من ضي روحك لي يضوي مكاني
مانيب لو بامدحك في الحسن ناصفك=واخاف ماتوفيك كل المعاني
كني من اول جيت للارض عارفك=لولاك ماطاب الهوى والزماني
قولي وانا في الحب مايوم اخالفك=امشي على كيفك وحبك سباني
ياملهمه في قلب حبك مصايفك=حسه سكن في الروح بين المحاني
جيتك لقيتك والجوى سيل جارفك=ياتؤام الروح الجوى معك جاني
احساس متبادل وانا فيه اناصفك=ياللي غرامك والهوى شي ثاني