حـــــــــلـم الـمـــسـتـحـــيــــل

[سعود القت]

يهيج صدري من صدوف الوقت والحظ الغبي = واغيب في غيهب مقافيش العسر ودروبها
مومن بما يحدث يقين وتابعٍ نهج النبي = غير الليالي تستدير وتلكز بعرقوبها
اصد هجمات الدهر وازوم وامس شنبي = وافتر وانا موريت والدنيا على مسحوبها
يثقل علي الحمل واشيله ويحفي منكبي = وادم شرهات الرها واقوم في مطلوبها
اسدد الرميه عليها والهدف في ملعبي = لا يارساله غامضه محدٍ فسر مكتوبها
ما باقي الا تعترض دربي وتنشد وشتبي = تمن جغمه والمزون مقونفات نصوبها
مدري متى تبهج طموحاتي ويصفي مشربي = ولدري متى جرب الليالي ما تحك جنوبها
ما قدرت شوحات جهدي وانكرابي وتعبي = تلد ليه عينها وتهزلي لغبوبها
ما ميزت تاريخ جداني معطرة الشبي = ولا عبرت قدر السيوف الحدب لا هدوبها
لا زلزلو صلب الحزم والضد يسبونه سبي = بالاسم نلبس ثوبها والقدر ماهو ثوبها
ويلومني من يدرق في ضل غيره ويحبي = عيب النشاما تعتنق بسلوب غير اسلوبها
ما يملك القدر الرفيع الا عزيز المنسبي = الدون ماهو صوبها لو قال انا في صوبها
ولحدٍ قطع جوعه بفخر الجوع من راس الظبي = وغيض الصدور المرهيه ناتج لفاح كروبها
تفطرت ثومة فوادي ما تحقق مطلبي = وصفت علاج العمر شرهين البشر قفوبها
امبه بحلم المستحيل بدون اغادر غيهبي = واسمع صدى صرخة غريقه تنتخي محبوبها
لا يا فزوع المرجله والفقر يلطم ويهبي = وراس الرها فيه الليالي ما تبين ضروبها
ارقى سنود مع النشاما والشكاله مكسبي = والمرجله شجرة وفا يكفي طرف نبنوبها
ولا علي خلاف ما دام المراجل مزهبي = ابهل مصارير السنين ولو لوت هندوبها