تستاهلين الحب

[فهدالمطلق]

بعد التحيه والسلام

اليكم هذه الابيات

عسى ان ترتقي لذائقتكم الشعريه


كان الغلا في محكم الشّعر طاريه=لعيونك ابيات القصايـد وهبنـاه
جاد الفكر واعطاني ابعد مغانيه=وامسيت ارتّب والقصايد عطاياه
هذا شعر من يهتويني وهاويه=وهذي قصيده نبض قلبي تولّاه
تستاهلين الحـب باسمى معانيـه=وتستاهلين اعذب بيـوتٍ مبنّـاه
لو ماانكتب فيك الشّعر وين اودّيه=انتي جماله وانتي احلـى مناداه
باسمك يزين الشّعر تزهر قوافيه=في وصفك اللي ماتعـدّد مزاياه
ابي اختصرهرجي ولاتسألي ليـه=لانّك بقلبي عارفه وش خفايـاه
القلب دونك يشتكي من بلاويه=يدخل بدونك فالعلل والمعاناه
حبّك سكن بالقلب هيمن بعاليـه=تدللـي ياغايـة النّفـس ومنـاه
مافيه غيرك بالخلايق مهاويـه=ولافيه غيرك يفرح القلب طرياه
انتي غرامه وامتلكتي موانيه =وانتي وحيده ساكنه في حنايـاه
مافيه منّـك بالمزاييـن مافيـه=مثل القمر وسط النّجوم المضوّاه
حزتي على كل الحلا واحتويتيه=زينك طغى ياشيخة الزين والجاه
كان العشق بالشّعر حصّل مراسيه=حبّي لك اكبر من كلامٍ كتبنـاه
هذا الشّعر ابدا الغلا في مبانيـه=وان كان قصّر فالسّموحه تقفّاه



ودمتم بخير