سقت المثايل مثل سوق المطايا

[صنداح الزلامى]

لا ساقني هاجوس فكري وغنيت = سقت المثايل مثل سوق المطايا

وسويت من عذبات الامثال سويت = نوادرٍ مثل بعضها حلايا

يجيلها في خافق القلب توقيت = ولها وصوفٍ غير ولها مزايا

واخذت من جزل البيوت وتنقيت = الهينه ماهي على مستوايا

وابدعت في مضمونها واستمريت = بنظم الحروف الصاملات الرهايا

مابي بها من عند الاصحاب تصويت = ولأ لي وراها قصود ولا نوايا

لا والله الا فيض صدري الى أشيت = اعنها واطلع بها للعلايا

ولا احكم على نفسي بحكم الطواغيت = الشعر له شعار وله سجايا

عمالقه في عرفهم ما تناسيت = فحول وزحولٍ دهاتٍ ودهايا

واليوم شعر مصممين الواليت = عراض المتون مرافقين الصبايا

لا يازمن اللي علينا توليت =و رحنا على درب المجنن ضحايا

استغفر الله كان في قولي اخطيت = لكن من كثر البلا والبلايا

اغضيت عن بعض البشر لين مليت = وابديتها ماعاد فيها خفايا