..,,..شاعره غصبٍ عن اللي يزعمون..,,..

[بنت القصيد]

طال الغياب
وللتواصل مع قلوبكم ..

اضع هذه المتواضعه علها ان تنال على اعجابكم ..




آه من كثر الهواجس والظنون= آه من كيد الحسود اليا حقد
ياكثر ماقلت للمخطي تمون= دوم امشيها ولا احسب بالعدد
يوم صدري مابقى به للطعون= متسع كمل على باق الجسد
مانخدع فالهرج مع ضحك السنون= من هل النمات راعين الحسد
كلها مع هرجة الحاقد تهون= السقيم اللي يفكرني ولد
والله اني بنت حامين الظعون= الرجال اللي على الشده سند
شاعره غصبٍ عن اللي يزعمون= ماعلي من الضعيف اليا نقد
يكتبون بسيرتي ما يكتبون= غير ظلمي في غيابي وش بعد
يوم به ناسٍ لغيري يقصدون= مارضيت اخذ قصيدي من احد
ذا جنون الشعر او شعر الجنون= من خيال البنت قام بلا عمد
في سما فكري وسط غر المزون= غيث قافي ينهمل لامن رعد
بارقه يخطف بصر بعض العيون= وبعضها من لمحته جاها رمد
شرّد القيفان عندي يلعبون= بالقصيد الجزل من قبل الهدد
لا سرحت وقمت اغني لي لحون= حضر القاف وتزهل واستعد
قال انا لبنت القصيد اكبر زبون= دام هي توفي وتصدق بالوعد
لاتهيالي على اهون مايكون= صار طعمه مثل طعم احلى شهد
ابدع القيفان من زود الشجون= اقعد الواقف واوقف من قعد
فكروا بالعقل ياللي تنظرون= لاتبنّون الخيام بلا وتدد
اتركوا ظلم العذارى بالظنون= واذكروا يوم القيامه واللحد


وسلامتكم ...

تحياتي

اختكـــــــم / القـــــاسميّه ..,,