خلوه في مفلاه

[ابو أنس]

يومه شهر بارودته يطلب الصيد=صيحت له ياخوي ابنخاك خله
به وصف من خلي حلاياه ويزيد=انه خَرَسْ والصوت لا ما يقلّه (1)
الريم يشبه سيد البيض والغيد=أدعج كحيل وجامع الزين كله
خلوه في مفلاه في مهمه البيد=يرعى الخزامى والنفل ويتدله(2)
لاترعبونه بالفشق والبواريد=خلو خشيف الريم سارح محله
سبحان من هو ميزه بالتفاريد=عجما ولكن المحاسن تدله
هذا الشبيه الرمز والوصف تجريد=وما احد(ن) يبي يذكر تواصيف خله
لكن خلي سيد الغيد في العيد=هو القمر والبيض عنده أهلّه
يفز له قلبي ولسمه تراديد=أحلى نغم وش لون سمعي يمله
واطوي سويعات الليالي بتنهيد=ما غير أطالع في خياله وظله
ياشايل سلاحه على زناده الأيد=دوك الحباري والحجل مسفهله
اقنص على ما تشتهي وانزح بعيد=خل الغزيل لايجي فيه خله
1ـ/أي لايستطيع رفع الصوت والإفصاح
2ـ/أي يلهو ويلعب