معاناة موظف

[عبدالله الشويمان]

ماشفت احد يرغب نهاية حياته=مثل الموظف ينتظر آخر الشهر

لاشاف بوكه قد تبخّر وفاته=ما حقق أدنى ما تمنّاه يِحْتر
‍
يضرب به الهوجاس ودّه وهاته=مدري مقاضي البيت أبدا او الحر
‍
والا فواتير الحكي مهلكاته=كلن يبي فاتورته ما تأخر
‍
والخادمه وفلوسها شاغلاته= يخاف من قولة خذ اشعار مخفر
‍
والى التفت لمويتره وكفراته=يلقى بها تسعين عله او اكثر
‍
كم مرة ضيّع قراية صلاته=واحيان لو هو في التحيات كبّر
‍
يحسب حساب رويتبه وهللاته=ونهار خامس كن ما في يده مر
‍
تبدا المشاكل تتبعه بخْطواته=لاشاف هندي البقاله تعثّر

اون جا لبيته قابلنّه بناته=اللي تبي فستان واللي تحسّر

تقول جانا الصيف ينشر عباته=واقرابنا كلن للاسفار حضّر

عوّد له الهوجاس يحرق بذاته=ويناظر التقويم يزفت ويزفر

يستبطي الأيام ومطاولاته=اليوم شهر اشلون بلحق على الشهر
سعد

يا سلام يا اخ سعد

نص رائع وجميل ..والله يقوم في عون من يتحدث عنه هذا النص

لا هنت يا الغالي لا هنت وصح السانك ملايين