هفوة العاقل ؟؟؟؟؟؟؟؟؟؟؟؟

[الطامي]

الا يالنشاما من البارح وهذا اليوم = تجول الروابع في ضميري واقلبها
اشره على نفسي واكيل العتب واللوم = مخافة مناقيد المناعير تشذبها
لأن هفوة العاقل لو انه بعد محشوم = كبيره عليه بشرق الارض ومغاربها
اداري من الزلات ومصادمة شغموم = اداريه وانزَله باعلا مراتبها
واخاف الدويني يبدل اعلومنا بعلوم = واداري من السفهان تلحق مشاهبها
وحقي على الطيب وحقه علينا دوم = والانذال في هفواتها مانعاتبها
وترى الظن زينه زين وسوه يجي مذموم = وسوه هلك ناس تفتل شواربها
حياة الرجل كنها طريقٍٍ وحيش وقوم = الى سلم من الافعى تجيله عقاربها
وحياة الرجل كدح وعقيده وفيها سلوم = والى اخطا من الثنتين ويش الحياه ابها
الا جنَب المله ولو كان خيره كوم = وسنة محمد دوم يسعى يحاربها
والااخطا من اسلوم القبايل شبيه البوم = فخله على اليسرى وجفف مشاربها
دام الادمي حيٍ فلاله الا المقسوم = ايلين النفوس الخضر تركز نصايبها