يقول الراوي اللي سار جزل القاف في طوعه

[فواز الغسلان]

يقول الراوي اللي سار جـزل القاف في طـوعه=تقول انه على نـبـع القوافي تسجـع اوتاره
دواوين العرب كـنـه بوسـط الصدر مطبوعه=وتشهد له رجال الصدق فـي عـبـده وسنجاره
زهور القاف في روضة ضميره تقل مزروعه=واذا دارت دوالـيـب القوافي يلـقط اثماره
يحـوز مـن القوافي ساس نـبـع القاف وفروعه=وجاشـه ضاري وسـط الـبـحـور الهوج واخطـاره
قوافي ضامرن خـالـف كـثـيـر الـنـاس بطـبـوعه=ولا يـبـنـي عـلـى تـقـيـيــم نـاسـن بالـعـرب غاره
ظعونه مامـشـت تـتـلـي هـزيل الحـرف ونجوعه=واذا عـطـشـت حروف القـوم جاشـه يفجر انهاره
عقب ماشاف شعر الناس ضمـن شراه وبـيـوعه=وهذا هو سبب قـلـة حـلاه وطـيحـة اسعاره
يشوف اللي نظـم بيـتـيـن والقيفان مصروعه=يعاند من غدى مـنجـم جواهرها وبيطـاره
يحـسب الشعـر عـسـر القاف مهما ضاع منفوعه=وقافن بايخن مـعـناه قافن طـاح مـقـداره
وطول الـقاف مايـشـفع لشعرن ضاع موضوعه=اذا ماكان يـبـدع مـن فـنونه شـان تكراره
كثير من العرب صارت بقـولـة عـاش مخـدوعه=لانه شـاور اللي بالـعرب ماتصدق اشواره
وترى القيفان ماتكـسـر رجـالـن دوم مرفوعه=ولا ترفـع ردي الناس مـهـما زاد ديناره
لك الله لو حروف المدح والـشعار مجـمـوعه=فلا تقدر تغطي ضوح شـمـس القـيـظ وانواره
كريم النفس مـهـما قـيل يبقى طـايلن بوعـه=وراع الطيب مايهـفـيه عــج الصيف وغباره
وترى اللي يهـفـي المخلوق ذل النـفس وخـضوعه=وقول الشعر عـنـد اللي يـتـابـع صوت مزماره
حلا القيفان لاصارت بنار الـضـيـم مدفوعه=وتـنـبـع من عروقن فـات لـه عامين منهاره
يقول الشعر من يرجف خـفـوقه زايدن روعه=وخايف من زعـل حاكم وقاله يـشـرح اعـذاره
او اللي ضاق بهروجـن بكـذب الناس مـشـفوعه=يبي يكشف لخـلق الله ردات الكذب واضراره
او اللي مات له غالي مـن الـدانـيـن بربوعه=حزيـنن لاطرى زوله يهـيـض الجاش باشـعاره
او اللي حالته مـثـلي قضى لـيـلـه على كوعه=سـبـايـب عـندلن وسط الضماير تلـتـهـب ناره
هنوفن في ربيع الـعـمـر سوداء عين مربوعه=عـيـون الريم وخـدوده بـيـاضه تقل جـماره
خذت عقلي وحـطـت في خفوق اهل الهوى لوعه=ولا ادري وش سـبب غـيـبة علوم الزين واخباره
اراجي شوفته حـزة غـياب الشمس وطـلـوعه=الا واجرح مـن يشكي هـمـوم الغـبـن بدياره
جحيم النار في روحن بهجـر الـولف مـفجـوعه=تنام الـنـاس وهجـوسي بوسـط الصدر محـتاره
بروحي جمرتن تمـنـع رقـود العين وهجـوعه=مع ان الياس غامـرنـي مـن الغـالي ومـسياره
طفت عقبه مصابيح الحـشـى والروح وشـمـوعه=وشـفـت النار في قـلـبن شكى مـن قلة انصاره
اصيح وصيحـتـي ماهي لراع الطيب مـسـموعه=زمانن صار جار الـبـيـت يجهل وش بلاء جـاره
واخبر الجار مايـشـبع وجاره يـشـتـكي جوعه=وهذا طـبـع مـن يتـبـع كرام الناس وخـياره
هموم الناس في مـالـه وطـيـب انـتاج مـشـروعه=ولا هـمـه قريـبـن صاح يشكي حر مـسـماره
واذا صارت خصال الـطـيب بين الناس مـقـطوعه=فلا تصبر بـدار الظـلـم والحاسـد ومنـشاره
ترى الارزاق من دار الحسد والـظـلـم مـنزوعه=ورزقك من كفوف اللي يغـيـث الـقـاع بامطـاره