ثلاثية الشنطة

[يوسف الشقران]

بعد التحيه ...

كانت بداية القصه في مطار الدوحه

وفي صالة الانتظار تحديدا ..

وإليكم أول الفصول ...


ثلاثية الشنطة




ليت يومن طارت الحلوه خطفها ارهابي=لاجل ماعرف يابو تركي بالخبر وجهتها
في مطار الدوحه اول قصتي وياها=عند كرسيي تبسم ناسيه شنطتها
يابوتركي شي مايوصف بعيني شفته=يابوتركي ما اتخيّل مستوى روعتها
راحت ومالله امرني أبتسم واسألها=ماعرفت لوين كانت ناويه رحلتها
دوّختني ومن هكالساعه وانا متلعوز=جننتني يابوتركي تنقطع ساعتها
من هكالساعه وانا صاير كما الرحاله=كل ديره جيتها ويلي على شوفتها
بس انقل من مطار ليا مطار ارحالي=كل من شفته سألته ماعرف حضرتها
يابو تركي عنك الموضوع ماهو خافي=والحقيقه مادري لوهي ديرتي ديرتها
شف جوازي خلّص وناطر على تجديده=والتذاكر شفتها ما تنتهي مدتها
يابو تركي كان عندك حل للي حاصل=وانت من ناسن عزيزه تنعشك فزعتها
طالبك تكفى أبي روحي معاها روحي=روحي اللي روّحت يومن خذت شنطتها






وبعد مرور سنه

تستمر مناشدتي للدكتور ابراهيم ( ابو تركي )

وتستمر الحكايه ..




يابو تركي لي سنه والخبر متخفي=صاحبتنا بالمطار اللي ذكرت اشحلّها
مشكله كلن يصير بحالتي متشفي=سيره الشنطه عسى لاعاد طارين لها
نارها من عام طول العام عيّت تطفي =جو حر وزاد حر الجو من نارن لها
دوختي طول السنه لعيونها ماتكفي=يوم أدّور في ديار الله يامن دلها
يابو تركي وانت دكتور وصداعي نصفي=ماتفيد احبوبك اللي جبت في طبنلها
يابو تركي كان غيرك واقفن في صفي=صف ربعك واطلب اخوانك ابي علمن لها
سم دربك وانت عرفك يختلف عن عرفي=يمكن انك تهتدي ياخوك لديارن لها
واشرط لمنهو معك ماتشتهي وموفّي=كلمتك عطها وغبطها وانا ظامنلها
بس جبلي علم عنها ياعساها تلفي=ياعشيري فزعتك خابرك انا قدنلها
قصتي طالت وحلمي في لقاها هفي=مادري ليه السيره اللي طولت ماملها
شف قصيدي عن سواها داله ومتعفي=كل فكره في خيالي تستوي قافن لها
عقدة الشنطه سطتبي والغلا ماخفي=لارجع يوم المطار ولارجع عذرن لها
يابو تركي خافي المكنون بين ضعفي=من ورى الشنطه همومي يوم اجيك افلها
باطلب الله والسنه عدت علي المتخفي=والقضيه لوشكيت الحال ربي يحلها





واخر الفصول


أما بعد ...




دكتور ذبح المشاعر صار حّلالي=ماعاد تنفع سوالف ضاع معناها
ثالث سنه قصة الشنطه على بالي=ماهملت خاطري ياخوك ذكراها
مافاد بالمسأله حلي وترحالي=لا واهني القمر بالخير مساها
دكتور ثالث سنه والحال منحالي=تطري عليّه ولا ادري اشلون ابنساها
حلمي كثر ماطلبته ماتهيالي=أطرد سراب الأمل متشفق لماها
دكتور بالنفس حره بيّدت حالي=طول الأمل دهور أفكاري وعناها
عندك خبر في عشيرك حب ماطالي=والنفس ماحصلت ياخوك مشهاها
ماعاد قلبي خضر والحق ينقالي=ماعدت اشوف الحلا في شخص إلاهــا
حبن دمرني ودمّرني ولازالي=والمسأله طالت ولازم تولاها
ماقلت لك دبر الحيله وباحتالي=ماقلت لك يابوتركي عطني ادواها
شف مرقدي يشتكي من طول الاهمالي=ياليت طول السهر ينفع بدعواها
لابد مانسى القضيه اول وتالي=لابد الايام تسعفني بسلواها
ذبح المشاعر قدر محتوم يالغالي=دكتور وهذي نهاياتي ومبداها


وسلامتكم
واسف على الاطاله

ــــــــ