بالك تحط النفس

[ابو أنس]

بالك تحط النفس في موقع(ن)غير=وتظن نفسك وارد(ن)كل الاحواض
حتى ولو كنت العطا دون تقصير=او كنت رمز(ن)للوفا.. ناض ما ناض
تشوف نفسك والبشر له مناظير=كلن يشوف وفي يده زود مقراض
وان كان نفسك تختزل موقف منير=غيرك ترا يمكن يلاقيه باجهاض
والوقت لا منّه سرا بالمشاوير=تصغر معه بعض المواقف والاغراض
كم جرّت(ن)في عيونهم كنها الزير=والعكس وارد واعرف الوقت خضاض
سود الليالي مدرجات على سير=مرورهن على الفتى حلو وحماض
احد(ن)كسنّه خشن الاصواف وقصير=واحد(ن)حرير(ن)وافي الذيل فضفاض
ولاتعتبر ظنك هو الحق وتحير=ففعال غيرك جن طويلات وعراض
ومهما يصير يصير لو صار تقصير=الرجل من طيّب سجاياه يعتاض
وكم واحد(ن) يخلط مع الحق تزوير=يزيد في هرجه حركات والفاض
يغريك وانت اتتابعه كنه امير=تلقاه في كل الإتجاهات خواض
والى خبرت معدنه صار قصدير=لمعه ولكن خلفها عيْ وامراض
ان زدت له مدح انتفخ خطرن ايطير=وان جيت في حاجه قلب وجهه اغتاض
بالمختصر مالي بكثر التعابير=نفسك ودربها على كل الاعراض