الشاعر الفارس . فيحان الرقاص الحافي

[داعي الشوق]

( توفي الشاعر والفارس فيحان الرقاص الحافي العتيبي سنة 1350 هـ تقريبا ،، )

يـقـول حافـيّـاً مـولّـع ومــولاع = جايّـه مـن الدنيـا همـوم وغرابيـل

منه الضميـر وواهـج القلـب يـلاّع = كمـا يلـوع الشعـف لـدن السنابيـل

ياراكب اربع ربع مـن عقـب مربـاع = شعـل شمعليّـات رمـل ٍ مرامـيـل

فج ّ ٍ مناكبهـن علـن لمـس الأقـواع = يعـرج بهـن إليـا عطـن ّ المداهيـل

خضـع الرقـاب ومشيهـن بالتخـوّاع = قطـم الفخـوذ لحومهـنّـه معـازيـل

عصو عصاو وبالعصا عصو وأطـواع = ومربعـات ٍ فـي سجـا كلّهـن حيـل

مافوقهـن الا الجـواعـد والانـطـاع = وعيـال فـي دوج الغـداري دواليـل

مسراحهن من ديـرة المـد والصـاع = دار بخيلـه ميـر أهلـهـا مشاكـيـل

إلهـن صـلاة الصبـح بغثـاه منشـاع = منشـاع مرميّـات خطـو المغـازيـل

والدرب من بيـن العرايـس ليـا تـاع = والعصـر يـم الخنفسـيّـه مخالـيـل

انصو فريدة شعر من حيـث الاسنـاع = وماجذبكـم شـوف مــد الدرابـيـل

لازم يطالعكـم مـع اللـيـل لـمّـاع = نـارا ً يقـرّب جمـرهـا للمعامـيـل

اول شببكـم خمـس طبخـات ٍ اتبـاع = بـريّـة ٍ مـابـهّـرت بالزبنـجـيـل

وبيـت ٍ يشيّـد يـوم حلّـو بالاسـراع = بيـت ٍ لشـرّاب الحشايـش مداهـيـل

ونجـر ٍ يلجلـج والمخاليـق هـجّـاع = تلقـى رويمـي يقرعـه تالـي الليـل

ومجـالـس ٍ ماقطّـعـت بالتلـمّـاع = من جاء محيّا ً بـه ومـن راح ماسيـل

في ضف ابو نايف حمى قاصر البـاع = يـوم الخفـاف يجانبـون الزمامـيـل

يلوذبـه مـن كـان ميّـس ومـرتـاع = لـن رفّعـوا لقطيّـهـن المساحـيـل

ولا الغفيلـي بسلّـة الهـنـد قـطّـاع = سيف ٍ مصقّل مـن خيـار المصاقيـل

حـوّاف للاعـداء وفـارس وقـطّـاع = وحـزام بالكربـه وبالصبـر حلحيـل

وبن خنيصر في ضحى الكـون بيّـاع = يهـوي عليهـم مثـل طيـر النبابيـل

وغيره ليـا شـاف المساييـر شـوّاع = ويفّرق اللـي يلزمـه مـن محاصيـل

ماهـو معيثـيـر ٍ خبـيـل ٍ وقـبّـاع = وإن جاك في وسط المجالس ليـا فيـل

وفيهم ترى ابن التوم للهجـن مـزواع = ربعي ذوي ربعـي كـرام ومشاكيـل

إرجـال عــرف ٍ وللـديـن تـبّـاع = وعيّـات لغصـون البلنـزي نواتـيـل

إمخضبّـه بايمانهـم كــل مـسـواع = للريـم فــوق أرقابهـنّـه عرابـيـل

غازي وضيف الله على كـل الانـواع = ربع ٍ علـى كثـر الخسـاره مراحيـل

ومعجب عشير إمخوتمت عشر الأصباع = وابو سنـد خصّـوه ذيـب الرياجيـل

ثم انصوا اللي رفقتـه تبـر الاوجـاع = برجس سعد قلبـي ليـا ضـدّه الشيـل

ومن عقب برجس درّجوا لاخو هـزّاع = فازع حديـد الهنـد عطـب المواشيـل

وباق العرب صدقان لكـن إلـي نـاع = ماكـل ّ ٍ اتعبلـه أركـان ومراسـيـل

مايبهج الضميـان ضحضاحـة القـاع = ولايبـرد الحـسّـات زود التعالـيـل

ولاواحـد ٍ جـايـز بلـيّـا تمـتّـاع = ولاوداي ٍ يخضـر جنابـه بـلا سيـل