خواطر

[ناصر عبيد الهواوي]

يالله يا منشي خفيف الغماما=يا واحد تقسيم الارزاق بيديك
تلطف بمن همه بقلبه تطاما=الى ظوى ليله يجيبه دواكيك
تقفي وتقبل به جنوب وشاما=ياقلب ويش اللي بمن مات مشقيك
ياقلب من فعلك دموعي تهاما=وراك ما تقنع بمن هم حواليك
ربع مشاكيل رجال حشاما=وجماعتك والله تعزك وتغليك
قال انت عن بعض السوالف تصاما=قلت اسفه الجاهل عسى الرب يحييك
يهرف ولا يعرف ويرمي كلاما =عوج وخرابيط ويظنه يسليك
رجل سواليفه شراب وطعاما=ورجل الى سولف بمجلس يغثيك
هون على نفسك واقل الملاما=يادعب سيلك لايجي من علاويك
ياعبيد انا افرح لا لفاني نشاما=مثل الفرح بك يوم ربي عطانيك
شروى الرجال الطيبين الكراما= اللي الى مالت ظروفك تواسيك
وحذراك عن خطو البخيل الخماما=قوم الرخا وان قل مالك تخليك
صدوا ولاردوا عليك السلاما=وان جيتهم في مجلس شبهروا فيك
والهرج مع هالجنس يرث سقاما=مثل الجرب لاتختلط فيه يعديك
والبخل عيب وبالشريعه حراما=واكرم لظيف الله ومولاه يعطيك
ما احد يقول النور مثل الظلاما=وعروق الاثله ماتسوى مساويك
وعن صحبة الانذال شوم وتساما=واقنع بما قدر لك الله ويغنيك
وعلى الرسول ازكى صلاة وسلاما=اعداد ما دكن بقلبي دواكيك