اموت بالعز لا بالعيش مذلول

[عبدالله البهلولي]

الهي عمري المحسوب كله = تخله مثل حيد العز مصقول
اعيش بالعز او روحي تشله = اموت بالعز لا بالعيش مذلول
فخير العيش ذي ما له مذله = وطيب العمر بالخلان مدبول
كفاف العيش ونعم به وضله = ولا مبطون ناهب كل محصول
طلبت العافيه لو وسط سله = وعفوك خير من مليار محمول
فكم مالك اراضي بعد فله = وكم مليار له بالبنك مقفول
وجسمه فيه عله والف عله = حياته لو ترى كالوبر مشلول
تمنى لو يعيش من دون شله = معافا دون ان ينظر لتنتول
بخيل النفس ما يعطي بسله = وجود النفس تنعش كل مبتول
ومن يشمخ على الباقين زله = فقلبه من فعال الخير معلول
لو انه طل نحو الجار طله = لحس الضيق ذي بالجار مشمول
وتنظيم العمر ياناس غله = ومن نظم كسب ما كان مأمول
ومن ينقل فقل ياذاك وله = ولو حتى كلامه كان معسول
فكم من سم حطوه وسط حله = لها منظر وفيها سم مبلول
وكون للجيد صاحب مثل ظله = ويوم الكر تلقاه سيل مسيول
ومن توجد كلامه حمق طله = مضيع ما بناه كالقفل مغلول
وكذاب الرفاق ياصاح خله = ترى الكذاب يعدي مثل مسلول
وذي مهموم حاول ان تسله = عساك للخير بالنيات مرسول