وشلون ياطيري مشن بك خطاويك

[تركي أبن خنيصر]

استمعت لشكوى احدهم مما واجهه من عقوق
تفاصيل الشكوى مؤلمه ، في زمن كثر فيه العقوق
فكان لي أن اعبر عنه ، لعلها تصل إلى مسامع من
يعنيه الأمر ويتقي الله في نفسه


وشلون ياطيري مشن بك خطاويك= تاقع بفخ اللي نصب لك سرابه
كيف العقل خانك وانا كنت برجيك = ونسيت نصحي لك بشعر وكتابه
حتى انغسل مخك وصاحبت مغويك = ورجعت لي عميان فاقد صوابه
تشوفني العادي وتترك معاديك = وتنسى بأني من عطاك المهابه
مافي جدودك نذل فاقول معديك = ولا في عمامك من عرف بالخيابه
تمشي على درب اللذي كان راميك= وما تعتبر باللي وصل له جنابه
يسقيك من سمه ويركض يحييك = حتى يشوفك طعم لأردى الذيابه
وده يشوفك مثل حاله باياديك = كل يوم والثاني يعيش بعذابه
وين العقل والعلم تنقذ بواقيك = ان كان بك باقي يعالج صوابه
لكن اظن العرق ماهو مخليك = وعرقك من ارضٍ بالملوحه معابه
مثلك مثل غصنٍ بدربك يباريك = ميّله سحر الحقد لا واسفابه
ارجي يرده خالق الناس باريك = ترجع معه للي ثنى لك ركابه
وان ما هداك الله فلا نيب هاديك = وان ماانقذك ربك فلا بك طبابه



ياسلام يابو عبدالله ’ مبدع في كل حالاتك ’ ابيات تنبض بها الحياة والعكس قابل للتأويل وينطبق عليه ماينطبق على المعكوس عليه ’ اسف على هالفلسفه او الفلفسه بس هذا النص يجبرني ان اتعلم الفلسفه لانه من فيلسوف الكلمة ابو عبدالله ’ فلله درك يا با عبدالله .....


تقبل مرور اخووووك ولافظ فوووووك..