طيـف الأسـى

[محمد اسماعيل الرفاعي]

طيـف الحُـزُن لملم دميعـات الأسى
شـايل وصيّة عِشْقي ليك
من هِمّتـو لا ضل لا في يوم نسى
دخل الجفون فتّش جواه رُكُن رُكُن
جفّف حِياضه ونشّفه
حتى الرموش نقّب حِداها وفتّشه
طاف العِروق ما خلى ليها مسايسه
مزج الدموع بي لون دِمـاي
دلق المزيج في تـوب أسـاي
شكّل رُكـامـات من سُحُب
وقفت حِداي
هدّت قواي
غطّت سماي
بي لون شقاي
وشلع البرق من قبلتي
هدّد مداين الوحده أسباب لوعتي
كل الخُلُوق إتوجّست
شِفقت علي من محنتي
وخافت كمان ينزل علي مطر الأسى
وإتوقّعت : كان ماهو وابل ببقى طل
أصلو الحُزُن ما غبّ يوم من دُنيتي
ومن ما زماني علي قِسى
ومركب أساهو حِداي رسى
يوماتي بمتدّ المطل
وغيم المواعيد التفرِّح
عمرو في يوم ما هطل
وفجأه طليت يا مُنـاي
جايب معاك بصيص أمل
سايق نسيمات الفرح
فرهدت ألوان من مرح
داويتو قلبي الإنجرح
من تاني عـاد نبضو ونتح
غنّيت حِداي أعذب غُنـاك
وهطل عليَّ مطر رضاك
ما إنتَ أصلك مُبتداي يا المُبتداك لي مُنتهى
وأنا مُنتهــاك
أهديتني من تاني الشعور
وضجّت حياتي هنا وسرور
ظليتني بي غيمة فرح
بتدور معاي حد ما أدور
وفرحت بيك .. فاخرت بيك
وفرحت معاي الغيمة رسمت قوس قُزح
يا بهجه غاصت في الجزور
يا المن جبينك شعّ نور
بي طلتك بدري اكتمل
بتّق في ساحاتي الأمل
حتى الحُزُن لملم وليداتو ورحل