لا يبعد رمش العيون ونظرها

[سعد الشقحاء]

لا يبعد رمش العيون ونظرها=ياللي غلاك اغلا من الشوف للعين
يا دنيتي يا شمسها يا قمرها=ياللي سكن حبك بوسط الشرايين
يا غاية شجون المحب وسمرها=يا وردة فاحت بعشق المحبين
مضمونها وأنتي عرفتي خبرها=من حاجتن بالنفس عنها تصدين
من مدةً وانا انتظر ونتظرها=وفي كل مره في وعدها تمدين
والصبر مليته ونفسي قهرها=والوعد دين ويلزمك توفي الدين
لو تطلبين الروح نرخص قدرها=وانتي على روحي وقلبي تمونين
أنتي غناة الروح وأنتي ثمرها=وانا وفي الحب وانتي تعرفين
روفي بحالي قبل يدني قدرها=ترى الوفاء شرعن بسلم الوفيين