الشاعر العميد / خالد البليهد ،

[داعي الشوق]

قصيدة للشاعر العميد / خالد بن حسن البليهد ( يرحمه الله )

و مؤرخة بتاريخ 15 / 6 / 1408 هـ


،،،،،،،،،،،،،،،،،،،،،




يالله يا منشي مزون المخاييل = يا مفني اجيالٍ و يا خالق اجيال

يا عالم غيب الليال المقابيل = يا عالمٍ باسرار تصريف الاحوال

يا عادل سود الليالي عن الميل = فيك الرجاء مربوط و الوقت ميال

لو كان تصمد له زحول الرجاجيل = ويشيل عنها ماضي الوقت ما شال

يالله تكفينا الشقا والغرابيل = و تعيننا في كل حالٍ وترحال

ما ينومن من يبخس والوزن و الكيل = من يامنه في موسم الكيل ما كتال

مع كل ريع له دروب و مداخيل = و الطيب ماله فيه درب و مدخال

الغاير الباير ركب سبّق الخيل = يعنّها لو كان ماهوب خيال

يعنها ويغير مع تالي الليل = ماله من الوازع ولو ربع مثقال

ينهش الحوم اهل النقاء والمشاكيل = بالزور و الباطل ولا عنده شكال

ماله مع اهل العرف و الميز تأهيل = واليا سمع بعلوم الابطال يهتال

يصغر بديوان الكرم و الافاضيل = ويكبر بعين أهل النقايص و الانذال

كلٍ على طبعه ولا فيه تبديل = في طبعه المألوف يا صعب الابدال

من الثناء دايم قليل المحاصيل = ومن الرداء يحمل على كتفه اثقال

ناسٍ ولو تدرس بعمً والانجيل = مهما تطول وتدرس العلم جهال

تاقع بنقص وتحسب النقص تكميل = غربال لو يغرف من الجم غربال

الشري علقم لو يساقا من النيل = كم واحد قبلي على ذا المثل قال

واليوم أقوله لو دخل فيه تعديل = معنى بداخل مهجتي واضرب مثال

واجهت بالدنيا صدوف وبهاذيل = بين الصديق وبين كاذب و محتال

مع ربعي أخلص ما استمع للاقاويل = أفخر بهم وقت المقابل والاقبال

من صد منهم عن قصاياه ما سيل = جعل الزهر يكسي نبانيب الاقذال

لو ما رعينا منه نفرح لهم حيل = الخير اليا جاء دارهم يشرح البال

أصل الكرم للضيف كم تذبح الحيل = والضيف يقلط عن سنا الشمس بظلال

في كل وقت يسكب البن والهيل = و الجار مايشكي لضيم الدهر حال

داخل مجالسهم تزين التعاليل = لو جيت ابانزح يمهم كيف ماحتال

نحيت عنهم واصبح الثقل بالشيل = أصعب من اللي حط في رجله اقفال

كم تلقح الايام بالريح و تحيل = حنا نزول وباقي الوقت ما زال

نصبر على الدنيا بعزم وتجاويل = ونثبت على درب الوفا و التجمال

وصلاة ربي عد وبل مهاليل = على النبي ازكى صلاتي والانفال