عـــــيـــــــون الــــمهـــــا

[شجاع عمر الأكلبي]

جات الآن وتجاوزوا عن قصورها


يازين فكري من أسبابك غدا شتّا=عزالله إني بعد لقياك والفتك

من بعد شوفة عيونك يالمها ضعتا=ياليتني كان يالمجمول ماشفتك

بين العرب لاتذكرتك تنهدتّا=غصب ٍ علي ماقدر أكتم لاتذكرتك

حاولت آصيدك وصرت أنت الذي صدتا=صادتني سهوم نجلك يوم قانصتك

وفقدت لي غالي ٍ من بعد عودتا=وأنا السبب يالفتونه يوم طاوعتك

فقدت قلب ٍ بحبّك هايم وختا=أتلى العهد به نهار ٍ فيه قابلتك

من بعدك الحال لاصيّف ولا شتّا=أخطا برادك وميّس من دفا بشتك

الوجه شاحب ودوك الحال منحتّا=لولا الطمع في حنانك كان ما أخبرتك

من شوفتك ياوزين الروح وش فدتا=غير السهر والهموم وشبّها صمتك

أصيح وأقول من حبّك تغربلتا=وأنته بعد تشتكي وتقول غربلتك

عليّ يازين كل عداي شمتّا=وأنا من الشامت وكل الملا صنتك

أمرك ونهيك عليّ مافيه خالفتا=ولا آخبر لك عليّ أمر ٍ وخالفتك

أبيك تافي بعهدك يوم عاهدتا=وأنا معك بالعهد وافي وطمنتك