الشعر يرفع صاحبه .الشعر والكيف

[الطائر المهاجر]

الشعر يرفع صاحبه او يوطيه= ومن كان عاقل ما جهل باختياره
فما كل ما يكتبه صالح لقاريه= فلْكلْ مقامٍ ما يناسب وقاره
ومنهو بلاه الله بأمرٍ يرديه = يستر على نفسه ويقعد بداره
وما يكتبه بالليل من وضع يمليه= لاينشره مادم يكشف ستاره
فالناس تحكم من حروفه وتشنيه=فكم شاعر شعره سبب في انهياره
يجني على نفسه ومن كان يغليه= ويشمت به القاصي ومن كان جاره
ولو هو استمع للي يحاول يوعيه= ادرك بأنه ساعيٍ في دماره
فالكيف سم العقل ياجاهلٍ فيه = كم من رجل ودّاه لاقصى انحداره
ومن قال لك مامون يجهل خوافيه=فالنار تبدا من حقير الشراره
حتى ولو هو كاس من يسر يشريه= ولو كان حبّه او حشيش بزقاره
لو قيل لك يعطيك ابداع ترجيه = تراه وهم مروجين التجاره
يحطم خلايا المخ من دون تدريه= وتبدا تصرف في مجون وحقاره
وفي الآخره عقلك يدور مداويه = في وقت ماله طب فيه الجداره
الله عطاك العقل وشلون تنهيه = والله عطاك الدين يحفظ ذماره
فلا تنجرف مع صاحب لك تداريه= واترك مجالس ماتعرف الطهاره
مايمهل الله من مشى في شهاويه = حتى ولو يومٍ وصل للصداره
في يوم يندم فالعقوبه تناديه = يشوفها في النفس وإلا صغاره
وفي الآخره معروف دربٍ يوديه= والعاقل اللي من يحدد مساره